VIDEO : आख्या जगानं प्रथमच पाहिलं मॅराडोना-पेलेंना TV सेटवर फुटबॉल खेळताना; 'हेडर'नं जिंकलं चाहत्यांचं मन

जगातील महान फुटबॉलपटू ब्राझीलचे पेले आता आपल्यात राहिले नाहीयेत. वयाच्या 82 व्या वर्षी त्यांनी अखेरचा श्वास घेतला. 29 डिसेंबर (गुरुवार) रोजी ब्राझीलमधील साओ पाउलो येथील रुग्णालयात त्यांचं निधन झालं. पेले यांच्या निधनानंतर जगभरातील फुटबॉल चाहत्यांनी त्यांना श्रद्धांजली वाहिलीये.

यादरम्यान त्यांचे जुने व्हिडिओ आणि मेसेज सोशल मीडियावर व्हायरल होत आहेत. पेलेंचा एक व्हिडिओ सध्या व्हायरल झाला आहे. यामध्ये पेले अर्जेंटिनाचा दिग्गज डिएगो मॅराडोनासोबत फुटबॉल खेळताना दिसत आहे.

वास्तविक, डिएगो मॅराडोना आणि पेले एका टीव्ही शोमध्ये उपस्थित होते. मॅराडोनानं पेलेला फुटबॉल खेळण्याची विनंती केली. तो म्हणाला, आम्ही मैदानावर समोरासमोर कधीच भेटला नाही, पण टीव्ही सेटवर एकत्र खेळण्याची इच्छा आहे. यानंतर पेले मॅराडोनाला नकार देऊ शकला नाही. मॅराडोना म्हणाला, आम्ही फक्त आमच्या डोक्यानं चेंडू मारु. फुटबॉलच्या भाषेत त्याला 'हेडर' असं म्हणतात.

हेडरनं प्रेक्षकांचं जिंकलं मन

मॅराडोना आणि पेले खेळण्यासाठी तयार झाले, तेव्हा शोमध्ये उपस्थित असलेले प्रेक्षक रोमांचित झाले. कारण, त्यांना जगातील दोन महान फुटबॉलपटू खेळताना पाहण्याची संधी मिळाली. पेलेनंही मॅराडोनाच्या हेडरचं कौतुक केलं. हेडर-हेडर खेळल्यानंतर दोन्ही दिग्गजांनी एकमेकांना मिठी मारली. हा जुना व्हिडिओ फुटबॉल चाहत्यांना खूप आवडला होता. आता तो अजूनही शेअर केला जात आहे.

पेले-मॅराडोना चांगले दोस्त

जगभरातील चाहते पेले-मॅराडोना यांची तुलना करत असले तरी, दोन्ही खेळाडूंनी एकमेकांबद्दल कधीही सारखं बोललं नाही. पेले आणि मॅराडोना नेहमीच एकमेकांचं कौतुक करायचे. पेले यांचा एक मेसेजही व्हायरल होत आहे. मॅराडोनाच्या मृत्यूनंतर त्यानं इन्स्टाग्रामवर लिहिलं की, 'मॅराडोनासोबत मी आकाशात फुटबॉल खेळणार आहे.'

पेलेंचे ब्राझीलसाठी 77 गोल

मिनास गेराइस या ब्राझिलियन राज्यात जन्मलेला दिग्गज फुटबॉलपटू अजूनही सेलेकाओसाठी (ब्राझील) सर्वाधिक गोल करणारा खेळाडू आहे. त्यानं 92 सामन्यांत 77 गोल केले. एक व्यावसायिक फुटबॉलपटू म्हणून पेलेनं एकूण तीन वेळा (1958, 1962, 1970) फिफा विश्वचषक जिंकला, जो अजूनही वैयक्तिक फुटबॉलपटूसाठी एक विक्रम आहे.