Virat Kohli: मीडिया-ट्रोलर्सने कोहलीवर खूप दबाव आणला, पण त्याने...; शास्त्रींचं विधान

नवी दिल्ली - टी-20 विश्वचषक क्रिकेट स्पर्धेत पाकिस्तानविरुद्ध नाबाद 82 धावा करून भारताच्या विजयात महत्त्वपूर्ण भूमिका बजावणाऱ्या विराट कोहलीचे सर्वजण कौतुक करत आहे. आता या यादीत भारतीय क्रिकेट संघाचे माजी मुख्य प्रशिक्षक रवी शास्त्री यांच्या नावाचाही समावेश झाला आहे.

शास्त्री यांनी कोहलीचे केवळ कौतुकच केले नाही तर कोहलीवर टीका करणाऱ्यांनाही चोख प्रत्युत्तर दिले. रवी शास्त्री म्हणतात की, मीडिया आणि ट्रोल्सने विराट कोहलीवर खूप दबाव आणला, पण त्याने सगळ्यांना गप्प केले.

कोहलीच्या पाकिस्तानविरुद्धच्या खेळीबद्दल बोलताना रवी शास्त्री म्हणाले, ' विराटची सर्वोत्तम टी-20 खेळी पाहत असताना मला अजिबात आश्चर्य वाटले नाही. मी फक्त त्याचीच वाट पाहत होतो. ऑस्ट्रेलियात हे घडणार हे मला माहीत होतं. विराट कोहलीचा ऑस्ट्रेलियातील रेकॉर्ड तुम्ही पाहा. ऑस्ट्रेलियातील खेळपट्ट्या त्याला अनुकूल आहेत. त्याला ऑस्ट्रेलियाच्या मैदानांवर खेळायला आवडते. पाकिस्तानविरुद्धही कोहलीचा रेकॉर्ड खूप चांगला आहे, असंही शास्त्री म्हणाले.

रवी शास्त्री म्हणाले, 'भारत-पाकिस्तान सामना पाहण्याच्या माझ्या अनुभवातील, हरिस रौफच्या गोलंदाजीवर भारतीय फलंदाजांनी मारलेले षटकार सर्वोत्त होते. या षटकांराची तुलना २००३ मध्ये सचिनने शोएब अख्तरच्या चेंडूवर मारलेल्या षटकाराशीच होऊ शकते. मात्र कोहलीने मारलेले दोन षटकार देखील दीर्घकाळ लक्षात राहतील, असंही शास्त्री यांनी नमूद केलं.