ICC Men's Cricket World Cup 2023 : दक्षिण आफ्रिकेला बांगलादेशची धास्ती; वानखेडेवर पुन्हा धावांचा पाऊस पडणार

जयेंद्र लोंढे

मुंबई - श्रीलंका, ऑस्ट्रेलिया व इंग्लंड या तिन्ही देशांना धूळ चारल्यानंतर दक्षिण आफ्रिकेच्या संघाचे विमान आकाशावरून वेगवान धावत आहे. मात्र धरमशालामधील लढतीत नेदरलँड्स संघाकडून धक्का मिळाल्यामुळे त्यांचा संघ उद्या होणाऱ्या बांगलादेशविरुद्धच्या लढतीत सावध झाला आहे.

बांगलादेश संघाने एकदिवसीय विश्वकरंडकात दक्षिण आफ्रिकेला दोन वेळा पराभूत केले आहे. या इतिहासाकडे कानाडोळा न करता दक्षिण आफ्रिका संघ मुंबईतील वानखेडे स्टेडियममध्ये उतरणार आहे. बांगलादेशसाठी ही लढाई अटीतटीची असणार आहे. त्यांच्यासाठी पुढील सर्व लढतींमध्ये विजय आवश्यक आहे.

मुंबईतील वानखेडे स्टेडियम हे फलंदाजांसाठी नंदनवन म्हणून ओळखले जाते. यंदाच्या विश्वकरंडकातील पहिल्याच लढतीत दक्षिण आफ्रिकेने ३९९ धावांचा पाऊस पाडला. इंग्लंडला या धावसंख्येचा पाठलाग करता आला नाही. त्यांचा संघ १७० धावांवरच गारद झाला. या लढतीच्या पूर्वसंध्येला खेळपट्टी झाकून ठेवली होती. मात्र येथील खेळपट्टीवर पुन्हा एकदा धावांचा पाऊस पडण्याची शक्यता आहे.

दक्षिण आफ्रिकेने यंदाच्या विश्वकरंडकात प्रथम फलंदाजी करताना धावाच धावा उभारल्या आहेत. श्रीलंकेविरुद्ध त्यांनी ५ बाद ४२८ धावांचा डोंगर उभारला होता. ऑस्ट्रेलियाविरुद्ध त्यांना ७ बाद ३११ धावा करता आल्या होत्या. गतविजेत्या इंग्लंडविरुद्ध ७ बाद ३९९ धावांची फटकेबाजी केली होती. नेदरलँड्स यांच्याविरुद्ध त्यांना २४६ धावांचे आव्हान ओलांडता आले नव्हते. याच लढतीत त्यांनी धावांचा पाठलाग केला होता.

२००७ व २०१९ मध्ये पराभूत

दक्षिण आफ्रिका-बांगलादेश यांच्यामध्ये एकदिवसीय विश्वकरंडकातील चार लढती झाल्या आहेत. यापैकी दोन लढतींमध्ये बांगलादेशने दक्षिण आफ्रिकेवर मात केली आहे.