CWC 2023 Prize money : यंदाचा वर्ल्डकप जिंकणाऱ्या संघावर लक्ष्मी होणार प्रसन्न; दहा - वीस नाही तर मिळणार इतके कोटी रूपये

ICC ODI World Cup 2023 Prize money : भारतात येत्या 5 ऑक्टोबरपासून सुरू होणाऱ्या वनडे वर्ल्डकपची चाहते चातकासारखी वाट पाहत आहेत. यंदाचा वर्ल्डकप भारतात होत असल्याने भारतीय संघाचे चाहते आपल्या संघाकडून विजयाची अपेक्षा ठेवत आहेत. गेल्यावेळी भारतात 2011 मध्ये वर्ल्डकप झाला होता. भारताने श्रीलंकेला मात देत 28 वर्षांनी वर्ल्डकपवर नाव कोरले. आता 12 वर्षानंतर पुन्हा एकदा भारताला वर्ल्डकप जिंकण्याची संधी आहे.

दरम्यान, आयसीसीने यंदाच्या वनडे वर्ल्डकपसाठी बक्षीसाची रक्कम किती असेल याची माहिती दिली. आयसीसीने दिलेल्या माहितीनुसार वर्ल्डकप जिंकणाऱ्या संघाला जवळपास 33 कोटी रूपये मिळणार आहेत. तर उपविजेत्या संघाला 16 कोटी रूपये बक्षीस म्हणून मिळतील.

याचबरोबर दोन सेमी फायनलिस्ट संघाला देखील कोट्यावधींचं बक्षीस मिळणार आहे. या संघाला प्रत्येकी 6 कोटी रूपये मिळतील. तर ग्रुप स्टेजमधील संघांना प्रत्येकी 82 लाख रूपये मिळणार आहेत.