IND vs AUS : बुमराहनंतर शार्दुल ठाकूर अन् 'हा' दिग्गज सलामीवीर तिसऱ्या ODI सामन्यातून बाहेर, जाणून घ्या कारण?

India vs Australia ODI : इंदूर वनडेत भारताने ऑस्ट्रेलियाचा 99 धावांनी पराभव करून तीन सामन्यांच्या मालिकेत 2-0 अशी अभेद्य आघाडी घेतली आहे. या सामन्यात शुभमन गिलने शतक झळकावले होते. आता यादरम्यान एक मोठी बातम्या येत आहेत की, शुभमन गिल आणि शार्दुल ठाकूर राजकोट येथे होणाऱ्या ऑस्ट्रेलियाविरुद्धच्या तिसऱ्या आणि शेवटच्या वनडेत खेळणार नाहीत.

या दोन्ही खेळाडूंना वर्कलोड मॅनेजमेंट अंतर्गत विश्रांती देण्याचा निर्णय भारतीय संघ व्यवस्थापनाने घेतला आहे. इंडियन एक्सप्रेसच्या वृत्तानुसार, गिल आणि शार्दुल संघासह राजकोटला जाणार नाहीत आणि त्याऐवजी ते थेट गुवाहाटीला जातील, जिथे टीम इंडिया इंग्लंडविरुद्ध पहिला सराव सामना खेळणार आहे.

ऑस्ट्रेलियाविरुद्ध खेळल्या गेलेल्या दुसऱ्या वनडेमध्ये गिलने शतक ठोकले होते. 2023 मधील त्याचे हे 5 वे शतक आहे. या वर्षी गिलने न्यूझीलंडविरुद्ध 2 शतके आणि बांगलादेश, श्रीलंका आणि ऑस्ट्रेलियाविरुद्ध प्रत्येकी 1 शतक झळकावले आहे. या वर्षी त्याने टी-20 मध्येही शतक झळकावले आहे.

2023 मध्ये एकदिवसीय क्रिकेटमध्ये सर्वाधिक धावा करणाऱ्या फलंदाजांच्या यादीत गिल पहिल्या क्रमांकावर आहे. या भारतीय फलंदाजाने आतापर्यंत 20 डावांमध्ये 72 च्या सरासरीने 1230 धावा केल्या आहेत. त्याचा स्ट्राइक रेट 105 आहे.

भारतीय संघ व्यवस्थापन वर्ल्डकप डोळ्यासमोर ठेवून खेळाडूंवर कामाचा भार जास्त देत नाही. याच कारणामुळे भारतीय कर्णधार रोहित शर्मा आणि विराट कोहलीला ऑस्ट्रेलियाविरुद्धच्या पहिल्या दोन वनडेसाठी विश्रांती देण्यात आली होती. हे दोन्ही वरिष्ठ खेळाडू राजकोट येथे होणाऱ्या तिसऱ्या आणि शेवटच्या वनडेसाठी टीम इंडियात सामील होतील. त्याचवेळी जसप्रीत बुमराहला इंदूरमध्ये खेळल्या गेलेल्या दुसऱ्या वनडेमध्येही विश्रांती देण्यात आली होती.