Video: रोहित शर्माचं करायचं तरी काय... आता परत केली तीच चूक!

तुम्ही पाहिलात का रोहितचा हा व्हिडीओ

भारतीय संघाचा धडाकेबाज सलामीवीर रोहित शर्मा हा त्याच्या फटकेबाजीसाठी ओळखला जातो. इंग्लंडविरूद्ध सध्या सुरू असलेल्या कसोटी मालिकेत आतापर्यंत रोहितने चार डाव खेळले. पहिल्या डावात तो तिशीत बाद झाला. दुसऱ्या डावात पावसामुळे त्याला आपली फलंदाजी दाखवताच आली नाही. त्यानंतर दुसऱ्या कसोटीच्या पहिल्या डावात रोहितने अतिशय सुदंर अशी फलंदाजी केली.११ चौकार आणि १ षटकार अशी खेळी सजवत त्याने ८३ धावा केल्या. पण दुसऱ्या कसोटीच्या दुसऱ्या डावात मात्र रोहित विशीतच बाद झाला. पहिल्या कसोटीत केलेली चूक पुन्हा केल्याने रोहितला दुसऱ्या डावात फार मोठी खेळी करता आली नाही.

पहिल्या कसोटीच्या पहिल्या डावात रोहित-राहुल जोडीने दमदार ९७ धावांची भागीदारी केली. त्यावेळी रोहितने ३० धावांचा टप्पा पार केल्यानंतर एक उसळता चेंडू आला. रोहितला तो फटका मारण्याचा मोह आवरला नाही आणि त्या चेंडूवर रोहित सीमारेषेवर झेलबाद झाला. या चुकीतून रोहितने धडा घेतला असेल अशी चाहत्यांची अपेक्षा होती. पण नेमका दुसऱ्या कसोटीच्या दुसऱ्या डावात जेव्हा भारताला रोहितकडून संयमी खेळीची गरज होती, त्याच वेळी रोहित पुन्हा एकदा इंग्लंडच्या जाळ्यात अडकला. रोहित २१ धावांवर खेळत असताना मार्क वूडने त्याला बाऊन्सर चेंडू टाकला. रोहितने तो चेंडू हवेत खेळला पण चेंडूचा वेग आणि उंची यांचा नीट अंदाज न आल्याने रोहित सीमारेषेवर झेलबाद झाला.

पाहा, रोहित कसा झाला बाद-

रोहितच्या त्या बेजबाबदार फटक्यानंतर त्याला टीकेचा सामनादेखील करावाच लागला. कारण दुसऱ्या डावात भारतीय संघाला एक भक्कम सलामी देणं ही राहुल-रोहित जोडीची जबाबदारी होती. पण राहुल अतिशय अप्रतिम अशा स्विंग चेंडूवर झेलबाद झाला. त्याने केवळ ५ धावा केल्या. त्यानंतर रोहितने संयमाने खेळणं चाहत्यांना अपेक्षित होतं, पण रोहितने बेजबाबदारपणे फटका खेळला आणि त्यामुळे भारत संकटात सापडला, अशी मतं काहींनी व्यक्त केली.