IND vs SA : अर्शदीप-दीपकची घातक गोलंदाजी, सुर्याची विक्रमी कामगिरी, विजयाची 5 प्रमुख कारणे

India VS South Africa : भारताने ऑस्ट्रेलियानंतर दक्षिण आफ्रिकेविरुद्धही विजयाची मालिका कायम ठेवली आहे. दक्षिण आफ्रिकेविरुद्धच्या तीन सामन्यांच्या T20I मालिकेतील पहिल्या सामन्यात भारताने आफ्रिकेचा 8 गडी राखून पराभव केला. या सामन्यात गोलंदाजांनी वर्चस्व गाजवले, पण भारतीय फलंदाज केएल राहुल आणि सूर्यकुमार यादव यांनी चमकदार कामगिरी करत अर्धशतक केले आणि भारताला विजय मिळवून दिला.

अर्शदीप -दीपक चहर या जोडीचा कहर

प्रथम फलंदाजी करताना दक्षिण आफ्रिकेला बावुमा आणि डी कॉककडून मोठ्या खेळीची अपेक्षा होती. बावुमाला पहिल्याच षटकात दीपक चहरने पॅव्हेलियनमध्ये पाठवले. यानंतर अर्शदीप सिंगने डावाच्या दुसऱ्याच षटकातच आफ्रिकेच्या फलंदाजीचे कंबरडे मोडले. त्याने या षटकाच्या पहिल्याच चेंडूवर डी कॉक, पाचव्या आणि सहाव्या चेंडूवर रिले रुसो आणि मिलरला बाद करून भारताला चौथे यश मिळवून दिले. रुसो आणि मिलर यांना खातेही उघडता आले नाही.

सुरुवातीच्या धक्क्यांनंतरही आफ्रिका सावरला नाही

पाच विकेट्स गमावल्यानंतर दक्षिण आफ्रिकेसाठी पुनरागमनाचा मार्ग खूप कठीण झाला. एडन मार्करम (24 चेंडूत 25 धावा), वेन पारनेल (37 चेंडूत 24 धावा) आणि केशव महाराज (35 चेंडूत 41 धावा) यांनी संघाची धावसंख्या 100 धावांच्या पुढे नेण्यात महत्त्वाची भूमिका बजावली. पाहुण्या संघाला मात्र पॉवर प्लेच्या पहिल्या तीन षटकांत झालेल्या धक्क्यातून सावरता आले नाही.

अश्विनची किफायतशीर गोलंदाजी

अर्शदीप आणि दीपक चहरच्या घातक स्विंग गोलंदाजीसमोर दक्षिण आफ्रिकेचे फलंदाज हतबल दिसत होते. दुसरीकडे अश्विनने त्याच्या कारकिर्दीतील सर्वात चांगली गोलंदाजी केली. त्याला विकेट मिळाली नाही, पण तरीही त्याच्या कामगिरीकडे दुर्लक्ष करता येणार नाही. त्याने मधल्या षटकांमध्ये आफ्रिकेच्या फलंदाजांना धावा काढू दिल्या नाहीत. चहलच्या जागी खेळायला आलेल्या अश्विनने 4 षटकात 1 मेडनसह केवळ 8 धावा दिल्या.

केएल राहुलची खेळी

रोहित शर्मा आणि विराट कोहली 7 षटकांत बाद झाल्यानंतर केएल राहुलवर डाव सांभाळण्याची मोठी जबाबदारी आली. राहुलला सुरुवातीला आफ्रिकन गोलंदाजांचा सामना करताना त्रास होत होता. मात्र सूर्यकुमार आल्यानंतर त्यानेही त्याचे आवडते शॉट्स खेळले आणि अखेरच्या क्षणी भारताने षटकार ठोकून विजय मिळवून दिला.

सूर्यकुमारची रेकॉर्डब्रेक कामगिरी

विश्वचषकापूर्वी सूर्यकुमारचा फॉर्म भारतासाठी समाधानकारक बाब आहे. कारण रोहित, राहुल आणि विराट यांच्यापैकी कोणीही एका फलंदाजाला उत्कृष्ट कामगिरी करता आली नाही, तर चौथ्या क्रमांकावर उतरून सामन्याचा उलथापालथ करण्याची ताकद या फलंदाजामध्ये आहे. दक्षिण आफ्रिकेविरुद्धच्या पहिल्या सामन्यात लवकर दोन विकेट पडल्यानंतर सूर्याने पुन्हा एकदा हेच करून दाखवले.