रोहितचा मोठेपणा! स्वत: माघार घेत युवा पोरांना दिली संधी

India vs West Indies, 3rd T20I : वेस्ट इंडीज विरुद्धच्या तिसऱ्या आणि अखेरच्या टी-20 सामन्यात भारतीय संघाचा कर्णधार रोहित शर्मानं (Rohit Sharma) पुन्हा एकदा नाणेफेक गमावली. पोलार्डने टॉस जिंकून पहिल्यांदा गोलंदाजी करण्याचा निर्णय घेतला. विराट कोहली आणि रिषभ पंतच्या अनुपस्थितीत भारतीय संघाच्या प्लेइंग इलेव्हनमध्ये अखेर ऋतूराज गायकवाडला (Ruturaj Gaikwad) संधी मिळाली. प्लेइंग इलेव्हनसमोर आल्यानंतर रोहित इशानसोबत (Ishan Kishan) डावाला सुरुवात करणार की ऋतूराजसोबत असा प्रश्न क्रिकेट चाहत्यांच्या मनात नक्की पडला असेल. पण वेगळाच प्रयोग या सामन्यात पाहायला मिळाला.

रोहित शर्माने युवा खेळाडूंवर डावाची सुरुवात करण्याची जबाबदारी दिली. इशान किशन आणि ऋतूराज गायकवाड ही जोडी मैदानात उतरली. याआधी इशान किशन आणि रोहित शर्मा या जोडीनं भारतीय संघाच्या डावाची सुरुवात केल्याचे पाहायला मिळाले होते. आयपीएलमध्ये विक्रमी बोली लागलेल्या इशानला आपल्यातील धमक दाखवण्यात अपयश आले आहे. त्याला या सामन्यात दमदार कामगिरी करुन दाखवावी लागेल.

दुसरीकडे ऋतूराज गायवाड पहिल्या दोन सामन्यात बाकावर बसला होता. त्याला तिसऱ्या आणि अखेरच्या सामन्यात संधी मिळाली. पण तो अवघ्या चार धावा करुन तंबूत परतला. त्याची जागा घेण्यासाठीही नवा प्रयोग पाहायला मिळाला. श्रेयस अय्यरने त्याची जागा घेतली. या युवा खेळाडूंशिवाय आयपीएलमधील कामगिरीनं विशेष लक्ष वेधणाऱ्या आवेश खानलाही टीम इंडियाकडून पदार्पणाची संधी मिळाली आहे. गोलंदाजीमध्ये तो कशी कामगिरी करणार हे पाहणे महत्त्वाचे ठरेल.

वेस्ट इंडीज संघाला वनडे सामन्यात 3-0 असे पराभूत केल्यानंतर भारतीय संघाने टी-20 मालिकाही जिंकली आहे. तीन सामन्यांच्या टी-20 मालिकेतील पहिले दोन्ही सामने जिंकून भारतीय संघाने ही मालिका आधीच खिशात घातली आहे. तिसऱ्या आणि अखेरच्या टी-20 सामन्यात विजय नोंदवून रोहितच्या नेतृत्वाखाली सलग तिसऱ्यांदा व्हाईट बॉलवर प्रतिस्पर्ध्याला व्हाईट वॉश करण्याची संघाला संधी आहे. रोहित पूर्णवेळ कर्णधार झाल्यानंतर भारतीय संघाने घरच्या मैदानावर न्यूझीलंडला व्हाईट वॉश दिला होता. वनडेत कॅरेबियन संघाचा त्यांनी दारुण पराभव केला. आता हीच पुनरावृत्ती टी-20 मालिकेत करण्याच्या इराद्यानेच टीम इंडिया मैदानात उतरली आहे.