FIH Awards 2021: हरमनप्रीत-गुरजीतसह पीआर श्रीजेशचे नामांकन

आंतरराष्ट्रीय हॉकी महासंघाने (International Hockey Federation ) हरमनप्रीत सिंग आणि गुरजीत कौर यांना 'प्लेयर ऑफ द इयर' अवॉर्डसाठी नामांकित केले आहे. भारतीय पुरुष हॉकी संघातील या दोघांशिवाय भारतीय संघाचा गोली पीआर श्रीजेशला 'गोलकीपर ऑफ द इयर' पुरस्काराच्या शर्यतीत आहे.

हरमनप्रीतने टोकियो ऑलिम्पिक स्पर्धेत आपल्या ड्रॅग-फ्लिकने 8 सामन्यात 6 गोल डागले होते. भारतीय संघाच्या कांस्य पदक विजयात त्याने मोलाचा वाटा उचलला होता. ऑलिम्पिक स्पर्धेत भारतीय पुरुष संघाने 41 वर्षांचा दुष्काळ संपुष्टात आणला होता. पुरुष संघाशिवाय महिला संघानेही ऑलिम्पिकच्या इतिहासात सर्वोच्च कामगिरी नोंदवली होती. महिला हॉकी संघातील शर्मिला देवीला सर्वोत्तम महिला खेळाडूंच्या पुरस्कारासाठी नामांकित करण्यात आले आहे. खेळाडूंशिवाय भारतीय पुरुष संघाचे मुख्य कोच ग्राहम रीड आणि भारतीय महिला हॉकी संघाचे कोच मारिन यांना सर्वोत्तम कोच म्हणून नामांकित करण्यात आले आहे.

खेळाडू, कोच, मीडिया आणि चाहते 23 ऑगस्ट ते 15 सप्टेंबर दरम्यान संबंधित खेळाडूंसाठी मतदान करु शकतात, अशी माहिती देखील एफआयएचने दिली आहे. या मतदान प्रक्रियेत राष्ट्रीय संघातील मतदानाला 50 टक्के तर मीडिया, चाहते आणि खेळाडूंच्या 25-25 टक्के अशी विभागणी करुन विजेता निवडण्यात येईल. ऑक्टोबरमध्ये विजेत्यांची नावे घोषीत करण्यात येतील. कोरोनाच्या संकटामुळे 2020 मध्ये पुरस्काराची घोषणा झाली नव्हती. त्यानंतर आता टोकियो ऑलिम्पिक स्पर्धेतील कामगिरीच्या जोरावर खेळाडूंची निवड करण्यात आली आहे.