IPL 2024: 'या' तीन ग्राऊंडवरच पहिल्यांदा होतील 300 धावा पार, डेल स्टेनचा मोठा दावा

Dale Steyn Post: इंडियन प्रीमियर लीग 2024 स्पर्धेत गेल्या काही दिवसात मोठ्या धावसंख्येचे सामने पाहायला मिळाले आहेत.

यंदाच्या हंगामात तब्बल तीनवेळा 250 धावांचा टप्पाही संघांनी ओलांडल्याचे पाहायला मिळाले, विशेष म्हणजे आयपीएलमधील सर्वोच्च धावसंख्याही या हंगामात दोनदा नोंदवली गेली. दोन्हीवेळी ही कामगिरी सनरायझर्स हैदराबादने केले.

त्याचबरोबर मंगळवारी (16 एप्रिल) राजस्थान रॉयल्सने कोलकाता नाईट रायडर्सविरुद्ध ईडन गार्डन्सवर खेळताना सर्वाधिक 224 धावांच्या लक्ष्याचा पाठलागही केला.

एकूणच मोठ्या धावसंख्या पाहून डेल स्टेनने मंगळवारी पोस्ट शेअर करत लिहिले की एक दिवस आयपीएलमध्ये 300 धावाही होतील. याशिवाय या 300 धावा पहिल्यांदा कोणत्या तीन मैदानावर होऊ शकतात, हे देखील त्याने पोस्टमध्ये सांगितले आहे.

स्टेनने पोस्ट केले की 'बेंगळुरू, मुंबई आणि कोलकाता. कदाचीत या आयपीएलमध्ये नाही, पण जेव्हाही 300 धावा होती, त्या या तीन मैदानांपैकी एका मैदानावर सर्वात आधी होतील.'

यंदाच्या आयपीएलमध्ये बेंगळुरू, मुंबई आणि कोलकाता या ठिकाणी बरेच मोठ्या धावसंख्येचे सामने झाले आहेत. बेंगळुरूमध्ये सोमवारी (15 एप्रिल) झालेल्या सामन्यात सनरायझर्स हैदराबादने 287 धावा केल्या होत्या, तर त्याच्या प्रत्युत्तरादाखल रॉयल चॅलेंजर्स बेंगळुरूने 262 धावा केल्या होत्या.

तसेच मुंबईतील वानखेडे स्टेडियमवर मुंबई इंडियन्सने 234 धावाही केल्या होत्या. याशिवाय हैदराबादमध्ये सनरायझर्स हैदराबादने 277 धावाही केल्या होत्या, ज्यानंतर मुंबईने 246 धावांपर्यंत मजल मारली होती. याशिवाय देखील अनेकदा 200 धावांचा आकडाही यंदाच्या आयपीएलमध्ये पार झाला आहे.

दरम्यान, आयपीएलमध्ये 30 सामन्यांतच 500 षटकारही पूर्ण झाले आहेत. तसेच सहा शतके झाले आहेत.