Faf du Plessis : आरसीबीच्या कर्णधाराचा पत्ता होणार कट? नव्या हंगामात नवा गडी शोधणार

Faf du Plessis RCB Captaincy : आयपीएलच्या 17 व्या हंगामाच्या एलिमिनेटर सामन्यात राजस्थान रॉयल्सने आरसीबीचा 4 विकेट्सनी पराभव केला. यानंतर सलग सहा सामने जिंकून प्ले ऑफ गाठणाऱ्या आरसीबीला पुन्हा एकदा आयपीएल विजेतेपदाने हुलकावणी दिली.

आरसीबीच्या पराभवानंतर आता पुन्हा एकदा आरसीबीच्या कॅप्टन बदलाची चर्चा सुरू झाली आहे. फाफ ड्युप्लेसिसने 2022 मध्ये विराट कोहलीकडून आरसीबीच्या नेतृत्वाची धुरा आपल्या खांद्यावर घेतली होती. तो आता पुढच्या हंगमात आरसीबीचा कर्णधार असण्याची शक्यता कमी आहे.

फाफला मिळालं संमिश्र यश

फाफ ड्युप्लेसिस हा फलंदाज म्हणून एक उपयुक्त खेळाडू आहे. मात्र त्याच्या नेतृत्वावर प्रश्नचिन्ह उपस्थित होत आहे. आरसीबीचा कर्णधार म्हणून फाफच्या कामगिरीकडं पाहिलं तर 2022 च्या हंगामात आरसीबीने गुणतालिकेत तिसरे स्थान पटकावले होते. मात्र प्ले ऑफमध्येच त्यांना गाशा गुंडाळावा लागला. त्या हंगामात फाफ हा आरसीबीचा सर्वाधिक धावा करणारा फलंदाज होता.

2023 च्या आयपीएल हंगामात त्याची कामगिरी अजून खालावली. आरसीबीने गुणतालिकेत सहावे स्थान पटकावले. त्यांना प्ले ऑफसाठी क्वालिफाय होता आलं नाही. 2024 च्या हंगामात आरसीबीची सुरूवात अत्यंत खराब झाली होती. मात्र त्यांनी सलग सहा सामना जिंकत प्ले ऑफ गाठले. मात्र एलिमिनेटर सामन्यात राजस्थान रॉयल्सने त्यांचा पराभव केला.

फाफचं वय मोठी अडचण?

फाफ ड्युप्लेसिस सध्या 39 वर्षाचा आहे. त्याचं वय पाहता तो आरसीबीसाठी लंबी रेस का घोडा नाहीये. तो टी 20 क्रिकेटमधून कधीही निवृत्ती घेण्याची शक्यता आहे. आरसीबीसाठी फाफ ड्युप्लेसिस हा कॅप्टन म्हणून दीर्घ काळासाठी फायद्याचा सौदा नाहीये.

फाफ ड्युप्लेसिसची रिप्लेसमेंट कोण?

बेन स्टोक्स : इंग्लंडचा कर्णधार बेन स्टोक्ससाठी 2023 चा हंगाम फारचा चांगला गेला नव्हता. मात्र त्याची आयपीएलमधील कामगिरी पाहिली तर त्यानं 45 सामन्यात 935 धावा केल्या आहेत आणि 28 विकेट्स देखील घेतल्या आहेत. त्याच्या नेतृत्व गुणांमुळे तो आरसीबीचा कॅप्टन होण्याच्या रेसमध्ये अग्रेसर आहे.

केएल राहुल : जर लखनौ सुपर जायंट्सने केएल राहुलला रिलीज करण्याचा निर्णय घेतला तर आरसीबी केएल राहुलकडे आपला भविष्यातील कर्णधार म्हणून पाहू शकते. मुळचा कर्नाटकचा असलेल्या केएल राहुलसाठी आरसीबी नक्कीच आग्रही असू शकते. असं झालं तर केएल राहुल आरसीबीमध्ये पुनरागमन करेल.

(IPL 2024 Marathi News)