IPL 2023 news : महेंद्रसिंह धोनीच्या तंदुरुस्तीकडे लक्ष

बंगळूर : चेन्नई सुपरकिंग्स व रॉयल चॅलेंजर्स बंगळूर या दोन दाक्षिणात्य संघांमध्ये उद्या आयपीएलमधील लढत रंगणार आहे. बंगळूर येथील एम. चिन्नास्वामी स्टेडियममध्ये दोन संघांमधील लढत खेळवण्यात येणार आहे.

दोन्ही संघांना आतापर्यंत चार लढतींमधून दोनमध्ये विजय मिळवता आला असून दोन लढतींमध्ये दोन्ही संघांना पराभवाचा सामना करावा लागला आहे. सध्या तरी दोन्ही संघ समान पातळीवर आहेत; मात्र चेन्नई सुपरकिंग्सचा कर्णधार महेंद्रसिंह धोनीच्या तंदुरुस्तीकडे या वेळी सर्वांच्या नजरा खिळल्या आहेत; मात्र या लढतीत खेळणार असल्याची माहिती चेन्नई सुपरकिंग्सचे सीईओ काशी विश्‍वनाथन आनंद यांनी दिली आहे.

चेन्नईसाठी ऋतुराज गायकवाड, डेव्होन कॉनवे व अजिंक्य रहाणे हे तीन फलंदाज छान कामगिरी करीत आहेत; मात्र मधल्या फळीतील फलंदाजांना आपला खेळ उंचवावा लागेल. अंबाती रायुडू, शिवम दुबे व रवींद्र जडेजा यांना अद्याप सूर गवसला नाही. शिवमला ११८.८४ च्या सरासरीने धावा करता आल्या आहेत. चेन्नईच्या गोलंदाजांना दुखापतींनी सतावले आहे.