IPL 2024, Points-Table: पंजाबविरुद्ध विजयाने मुंबईला फायदा, पाँइंट्स-टेबलमध्ये घेतली उडी; जाणून घ्या संघांच्या क्रमवारी

IPL 2024, Points-Table: इंडियन प्रीमियर लीग 2024 स्पर्धेत पंजाब किंग्स विरुद्ध मुंबई इंडियन्स संघात 33 वा सामना गुरुवारी (18 एप्रिल) झाला. मुल्लनपूर येथे झालेल्या या सामन्यात मुंबईने 9 धावांनी विजय मिळवला. मुंबईच्या या विजयानंतर पॉइंट्स टेबलमध्ये बदल झाला.

आयपीएलच्या 17 व्या हंगामातील मुंबईचा हा सात सामन्यांमधील तिसरा विजय आहे. त्यामुळे आता त्यांचे 6 गुण झाले आहेत. त्याचमुळे त्यांनी आता गुणतालिकेत गुजरात टायटन्सला मागे टाकून सातवा क्रमांक मिळवला आहे.

गुजरात टायटन्सनेही सात पैकी तीन सामने जिंकले असून त्यांचेही 6 गुण आहेत. परंतु, मुंबईचा नेट रन रेट गुजरातपेक्षा चांगला आहे.

याशिवाय दिल्ली कॅपिटल्सनेही सात पैकी तीन विजय मिळवले आहे, तर लखनौ सुपर जायंट्सने सहा पैकी तीन सामने जिंकले आहेत. त्यामुळे त्यांचेही 6 गुण आहेत. परंतु, नेट रन रेटच्या फरकामुळे लखनौ पाचव्या क्रमांकावर आणि दिल्ली सहाव्या क्रमांकावर आहेत.

दरम्यान, पंजाबला मुंबईविरुद्ध पराभव स्विकारावा लागल्याने नुकसान झाले आहे. पंजाब आता थेट नवव्या क्रमांकावर घसरले आहेत. पंजाबने सात सामन्यांपैकी केवळ दोनच सामने जिंकले आहेत. त्यामुळे त्यांचे केवळ 4 गुण आहेत.

त्यांच्याखाली रॉयल चॅलेंजर्स बेंगळुरू आहेत. बेंगळुरूला सात सामन्यांपैकी फक्त एकच सामना जिंकता आला आहे. त्यामुळे त्यांचे केवळ 2 गुणच आहेत.

गुणतालिकेतील पहिल्या चार क्रमांकांबद्दल सांगायचे झाले, तर राजस्थान रॉयल्स संघ सात सामन्यांतील सहा विजय मिळून 12 गुणांसह अव्वल क्रमांकावर आहे.

तसेच दुसऱ्या क्रमांकावर कोलकाता नाईट रायडर्स, तिसऱ्या क्रमांकावर चेन्नई सुपर किंग्स आणि चौथ्या क्रमांकावर सनरायझर्स हैदराबाद संघ आहे.

या तिन्ही संघांनी सहा सामन्यांतील चार सामन्यात विजय मिळवले आहेत. त्यामुळे या तिन्ही संघांचे 8 गुण आहेत. परंतु, नेट रन रेटच्या फरकामुळे त्यांचे स्थान निश्चित झाले आहेत.