IPL : यशस्वी जयस्वालची विक्रमी खेळी

कोलकता - यशस्वी जयस्वालच्या नाबाद ९८ धावांच्या विक्रमी खेळीच्या जोरावर राजस्थान रॉयल्सने गुरुवारी कोलकता नाईट रायडर्सचा ९ विकेट व ४१ चेंडू राखून धुव्वा उडवला. राजस्थान रॉयल्सने सहाव्या विजयासह गुणतालिकेत तिसऱ्या स्थानावर धडक मारली. या विजयासह राजस्थान रॉयल्सने प्ले ऑफच्या दिशेने वाटचाल केली. कोलकता नाईट रायडर्सच्या प्ले ऑफमध्ये पोहोचण्याच्या आशांवर पाणी फेरले गेले. त्यांना सातव्या पराभवाला सामोरे जावे लागले.

दरम्यान, याआधी राजस्थानने नाणेफेक जिंकून प्रथम क्षेत्ररक्षण करण्याचा निर्णय घेतला. ट्रेंट बोल्टने जेसन रॉय (१० धावा) व रहमानुल्लाह गुरबाज (१८ धावा) या दोघांना पॅव्हेलियनमध्ये पाठवत कोलकत्याला बॅकफूटवर फेकले. यानंतर व्यंकटेश अय्यर व नितीश राणा या जोडीने कोलकताचा डाव सावरण्याचा प्रयत्न केला.

राजस्थानसाठी युझवेंद्र चहल याने या लढतीत प्रभावी कामगिरी केली. त्याने सुरुवातीला नितीश याला २२ धावांवर बाद करीत अय्यर व त्याची जोडी तोडली. अय्यरसोबत आंद्रे रस्सेल महत्त्वाची भागीदारी करील असे वाटत होते. पण के.आसिफच्या गोलंदाजीवर रस्सेल १० धावांवर बाद झाला. अय्यरने एका बाजूने दमदार फलंदाजी कायम ठेवली. त्याने ४२ चेंडूंमध्ये २ चौकार व ४ षटकारांसह ५७ धावांची खेळी साकारली. पण पुन्हा एकदा चहल त्यांच्यासाठी धावून आला. चहलच्या गोलंदाजीवर अय्यर बोल्टकरवी झेलबाद झाला.

चहलने यानंतर फॉर्ममध्ये असलेला रिंकू सिंग (१६ धावा) व पुनरागमन करणारा शार्दुल ठाकूर (१ धाव) यांना तंबूत पाठवले. कोलकता संघाने २० षटकांत ८ बाद १४९ धावा फटकावल्या. चहलने २५ धावा देत चार फलंदाजांना बाद केले. आयपीएलमध्ये सर्वाधिक फलंदाज बाद करण्याचा विक्रम आता त्याच्या नावावर आहे. जयस्वाल शतकाजवळ पोहचल्यावर त्याचा सहकारी आणि कर्णधार संजू सॅमसनने त्याला शतकपूर्ण करण्यासाठी स्ट्राईक दिला, परंतु यशस्वी जयस्वालने स्वतःच्या शतकापेक्षा संघाच्या मोठ्या विजयाला प्राधान्य दिले.

संक्षिप्त धावफलक

कोलकता नाईट रायडर्स २० षटकांत ८ बाद १४९ धावा (व्यंकटेश अय्यर ५७, नितीश राणा २२, युझवेंद्र चहल ४/२५, ट्रेंट बोल्ट २/१५) पराभूत वि. राजस्थान रॉयल्स १३.१ षटकांत १ बाद १५१ धावा (यशस्वी जयस्वाल नाबाद ९८ - ४७ चेंडू, १२ चौकार, ५ षटकार, संजू सॅमसन

नाबाद ४८).