IPL 2024, KKR Vs LSG : अखेर केकेआरने कोड क्रॅक केला; सॉल्टच्या सॉलिड खेळीनं लखनौविरूद्ध साजरा केला पहिला विजय

सुपर संडेमध्ये (14 एप्रिल) आयपीएल 2024 मध्ये 28 वा सामना कोलकाता नाईट रायडर्स आणि लखनौ सुपर जायंट्स यांच्यात ईडन गार्डन्सवर खेळला गेला. हा सामना कोलकाता नाईट रायडर्सने 8 विकेट्सने जिंकला.

या सामन्यात कोलकाताचा कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला होता. त्यानंतर लखनौने प्रथम फलंदाजी करताना 20 षटकात 7 बाद 161 धावा केल्या आणि कोलकातासमोर 162 धावांचे आव्हान ठेवले.

लखनौकडून निकोलस पूरनने सर्वाधिक 45 धावांची खेळी केली, तर कोलकाताकडून मिचेल स्टार्कने सर्वाधिक 3 विकेट्स घेतले आहेत.

लखनौने दिलेले 162 धावांचे आव्हान कोलकाताने 15.4 षटकात 2 विकेट्स गमावत पूर्ण केले. कोलकाताकडून फिल सॉल्टने 89 धावांची सर्वोच्च खेळी केली. लखनौकडून मोहसीन खानने 2 विकेट्स घेतल्या आहेत.

10 षटकांनंतरही लखनौला कोलकाताची विकेट घेता आली नाही. सॉल्टने अर्धशतक पूर्ण केल्यानंतरही आपली लय कायम ठेवत कोलकाताच्या विजयावर शिक्कामोर्तब केले. त्याने 16 व्या षटकाच्या चौथ्या चेंडूवर कोलकातासाठी विजयी चौकार ठोकला. तसेच सॉल्ट आणि श्रेयस यांच्यात तिसऱ्या विकेटसाठी 120 धावांची नाबाद भागीदारी केली.

फिल सॉल्टने 47 चेंडूत 14 चौकार आणि 3 षटकारांसह 89 धावांची नाबाद खेळी केली, तसेच श्रेयस अय्यरने 38 चेंडूत 38 धावांची खेळी केली.

पॉवर-प्लेमध्येच 2 विकेट्स गमावल्यानंतर कोलकाताचा डाव सलामीला फलंदाजीला आलेल्या सॉल्टने कर्णधार श्रेयस अय्यरला साथीला घेत सावरला. सॉल्टने काही आक्रमक शॉट्स खेळत 26 चेंडूत अर्धशतकही पूर्ण केले. यासह 10 षटकात कोलकाताने 2 बाद 101 धावा केल्या.

मोहसिनने नारायण पाठोपाठ चौथ्या षटकाच्या पहिल्याच चेंडूवर अंगक्रिश रघुवंशीला बाद केले. त्याचा झेल यष्टीरक्षक केएल राहुलने पकडला. रघुवंशी 6 चेंडूत 7 धावा केल्या.

पहिल्या षटकात 22 धावा निघाल्यानंतर दुसऱ्या षटकात मात्र मोहसिन खानने चांगली गोलंदाजी केली. त्याने पहिल्या पाच चेंडूत एकही धाव दिली नव्हती, याशिवाय त्याने धोकादायक सुनील नारायणला अवघ्या 6 धावांवर बाद केले.

लखनौने दिलेल्या 162 धावांच्या आव्हानाचा पाठलाग करण्यासाठी कोलताकडून सुनील नारायण आणि फिल सॉल्ट उतरले, तर पहिल्या षटकात गोलंदाजीसाठी लखनौकडून शामर जोसेफ उतरला.

पहिलाच सामना खेळणाऱ्या जोसेफसाठी हे पहिले षटक फारसे चांगले ठरले नाही. त्याने या षटकात 2 वाईड आणि 2 नो बॉल टाकले. त्यामुळे त्याला एकूण 10 चेंडू या षटकात टाकायला लागले. 2 वाईडपैकी एका चेंडूवर चौकारही गेला. या षटकात एकूण 22 धावा निघाल्या.

स्टार्कने 20 व्या षटकाच्या शेवटच्या चेंडूवर अर्शद खानला त्रिफळाचीत केले. यामुळे त्याने तीन विकेट्स पूर्ण केल्या. यासह लखनौचा डाव 20 षटकात 7 बाद 161 धावांवर संपला.

पाच विकेट्स गेल्यानंतर अखेरच्या षटकांमध्ये निकोलस पूरनने आक्रमक खेळ केला होता. त्यामुळे त्याने लखनौला दीडशे धावांचा टप्पा पार करून दिला.

मात्र, तो अर्धशतकाजवळ असताना शेवटच्या षटकाच्या पहिल्या चेंडूवर मिचेल स्टार्कने त्याला बाद केले. त्याचा झेल सॉल्टने घेतला. पूरनने 32 चेंडूत 45 धावांची खेळी केली. या खेळीत त्याने 2 चौकार 4 षटकार मारले.

आयुष बडोनी निकोलस पूरनसह लखनौचा डाव पुढे नेत होता. परंतु, त्याचा अडथळाही सुनील नारायणने दूर केला. त्याला 15 व्या षटकाच्या चौथ्या चेंडूवर नारायणने अंगक्रिश रघुवंशीच्या हातून झेलबाद केले. बडोनीने 27 चेंडूत 2 चौकार आणि 1 षटकारासह 29 धावांची खेळी केली. 15 षटकापर्यंत लखनौने 5 बाद 113 धावा केल्या.

केएल राहुल बाद झाल्यानंतर स्टॉयनिस फलंदाजीला आला होता. पण तो 5 चेंडूत 10 धावांवरच माघारी परतला. त्याला 12 व्या षटकात वरुण चक्रवर्तीने चकवले. या षटकातील चौथ्या चेंडूवर स्टॉयनिसचा अफलातून झेल यष्टीरक्षक फिल सॉल्टने घेतला.

खेळपट्टीवर स्थिरावलेल्या केएल राहुलला 11 व्या षटकात आंद्रे रसेलने 39 धावांवर बाद केले. रसेलने टाकलेल्या या षटकातील पहिल्या चेंडूवर राहुलने षटकार ठोकला होता. परंतु, पुढच्याच चेंडूवर त्याला रसेलने डीप-मीड विकेटला रमणदीप सिंगच्या हातून झेलबाद केले.

पहिल्या दोन विकेट्स पॉवरप्लेमध्ये गमावल्यानंतर लखनौचा डाव कर्णधार केएल राहुलने आयुष बडोनीला साथीला घेत सावरला होता. त्यामुळे लखनौने 10 षटकात 2 बाद 72 धावा केल्या. 10 षटके झाली तेव्हा केएल राहुल 33 धावांवर आणि बडोनी 18 धावांववर खेळत आहेत.

कोलकाता नाईट रायडर्सने लखनौ सुपरजायंट्सला दुसरा धक्का दिला आहे. दीपक हुड्डाला मिचेल स्टार्कने पॅव्हेलियनमध्ये पाठवले आहे. हुड्डा 10 चेंडूत आठ धावा करून बाद झाला. आयुष बडोनी नवा फलंदाज म्हणून क्रीझवर आला आहे.

क्विंटन डी कॉक आऊट झाला आहे. वैभव अरोराने डी कॉकला बाद करून संघाला पहिले यश मिळवून दिले. डी कॉक आठ चेंडूत 10 धावा करून बाद झाला. आता दीपक हुड्डा कर्णधार केएल राहुलसह क्रीजवर आहे.

डी कॉकने ओव्हरच्या पहिल्या आणि दुसऱ्या चेंडूवर चौकार मारला. पहिल्या षटकात संघाने 10 धावा केल्या. डी कॉक 10 धावा करून खेळत आहे. राहुलला अद्याप खाते उघडता आलेले नाही. कोलकाताने दुसरे षटक वैभव अरोराकडे सोपवले आहे.

कोलकाता नाईट रायडर्स : फिलिप सॉल्ट (विकेटकीपर), सुनील नरेन, व्यंकटेश अय्यर, श्रेयस अय्यर (कर्णधार), अंगक्रिश रघुवंशी, आंद्रे रसेल, रमणदीप सिंग, मिचेल स्टार्क, हर्षित राणा, वैभव अरोरा, वरुण चक्रवर्ती.

लखनौ सुपर जायंट्स : क्विंटन डी कॉक, केएल राहुल (विकेटकीपर/कर्णधार), दीपक हुडा, आयुष बडोनी, मार्कस स्टॉइनिस, निकोलस पूरन, कृणाल पंड्या, रवी बिश्नोई, मोहसिन खान, शामर जोसेफ, यश ठाकूर.

लखनौ सुपरजायंट्सविरुद्धच्या सामन्यात कोलकाता नाइट रायडर्सचा (केकेआर) कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला. केकेआरने या सामन्यासाठी रिंकू सिंगला बाहेर ठेवले असून त्याच्या जागी हर्षित राणाला प्लेइंग इलेव्हनमध्ये स्थान दिले आहे.

शमर जोसेफ लखनौ संघात पदार्पण करणार आहे. या सामन्यासाठी लखनौने काही बदल केले आहेत. या सामन्यासाठी देवदत्त पडिक्कल आणि नवीन उल हक यांची निवड करण्यात आलेली नाही, तर दीपक हुड्डा आणि मोहसीन खानचे पुनरागमन झाले आहे.

कोलकाता नाईट रायडर्स आणि लखनौ सुपर जायंट्स यांच्यातील सामना भारतीय वेळेनुसार दुपारी 3.30 वाजता होणार आहे. टॉस त्याच्या अर्धा तास आधी म्हणजेच दुपारी 3 वाजता होईल.