KKR vs RR : युझीचा विकेट्सचा चौकार! फिरकीसमोर केकेआरने जोडले हात

KKR vs RR Yuzvendra Chahal : राजस्थान रॉयल्सने नाणेफेक जिंकून प्रथम गोलंदाजी करत होम ग्राऊंडवर खेळणाऱ्या कोलकाता नाईट रायडर्सला 149 धावात रोखले. राजस्थानचा फिरकीपटू युझवेंद्र चहलसमोर केकेआरच्या भल्या भल्या फलंदाजांनी हातच टेकले. युझवेंद्र चहलने नितीश राणा (22), व्यंकटेश अय्यर (57), शार्दुर ठाकूर (1) आणि रिंकू सिंह (16) यांची शिकार केली. याचबरोबर युझवेंद्र चहल हा आयपीएलमधील सर्वाधिक विकेट्स घेणारा गोलंदाज देखील ठरला. केकेआरकडून संथ सुरूवात करणाऱ्या व्यंकटेश अय्यरने सर्वाधिक 57 धावा केल्या.

आपल्या होम ग्राऊंडवर प्रथम फलंदाजी करणाऱ्या कोलकाता नाईट रायडर्सला राजस्थानचा स्टार गोलंदाज ट्रेंट बोल्टने पॉवर प्लेमध्येच दोन धक्के दिले. बोल्टने सलामीवीर जेसन रॉयला 10 धावांवर तर रहमनुल्ला गुरबाजला 18 धावांवर बाद केले. दोन्ही सलामीवीर माघारी गेल्यानंतर केकेआरला पॉवर प्लेमध्ये 37 धावांपर्यंतच मजल मारता आली. व्यंकटेश अय्यरने तर 12 चेंडूत फक्त 2 धावाच केल्या.

पॉवर प्लेमधील संथ सुरूवातीनंतर नितीश राणा आणि व्यंकटेश अय्यर यांनी केकेआरचा डाव सावरत तिसऱ्या विकेटसाठी 48 धावांची भागीदारी रचली. अय्यरनेही आपपला गिअर बदलला होता. मात्र ही जोडी युझवेंद्र चहलने फोडली. त्याने राणाला 22 धावांवर बाद केले. यानंतर आक्रमक झालेल्या अय्यर आणि आंद्रे रसेल यांनी केकेआरला 13 व्या षटकात शतकी मजल मारून दिली. मात्र त्यानंतर केएस आसिफने रसेलला 10 धावांवर बाद करत केकेआरला मोठा धक्का दिला.

दरम्यान, व्यंकटेश अय्यरने आपले अर्धशतक पूर्ण केले. मात्र 42 चेंडूत 57 धावा करणाऱ्या अय्यरचा चहलनेच काटा काढला. अय्यर बाद झाला त्यावेळी केकेआरच्या 16 षटकात 5 बाद 127 धावा झाल्या होत्या. अय्यर पाठोपाठ चहलने शार्दुल ठाकूरला 1 धावेवर बाद करत केकेआरला सहावा धक्का दिला.

युझवेंद्र चहलने आपल्या तिसऱ्या षटकात व्यंकटेश अय्यर आणि शार्दुल ठाकूर यांची शिकार केली होती. त्याने चौथ्या षटकात रिंकू सिंहची (16) शिकार करत केकेआरला अजून एक मोठा धक्का दिला. यानंतर संदीप शर्माने शेवटच्या षटकात फक्त 7 धावा देत केकेआरला 20 षटकात 8 बाद 149 धावात रोखले.

(Sports Latest News)