आंतरराष्ट्रीय बॅडमिंटन स्पर्धा : नागपूरच्या मालविका बनसोडची संभाव्य भारतीय संघात निवड

नागपूर : येत्या ३ ते ११ ऑक्टोबर दरम्यान अरहस (डेन्मार्क) येथे होणाऱ्या थॉमस-उबेर कप बॅडमिंटन स्पर्धेसाठी नागपूरच्या मालविका बनसोडची संभाव्य भारतीय संघात निवड करण्यात आली आहे. या स्पर्धेमुळे तब्बल सात महिन्यांनंतर आंतरराष्ट्रीय बॅडमिंटन स्पर्धा होणार आहे.

भारतीय संघाचे शिबिर हैदराबाद येथील पी. गोपीचंद अकॅडमीत सोमवारपासून झाले आहे. शिबिरासाठी मालविका हैदराबाद येथे दाखल झाली आहे. कोरोनाची तपासणी आणि त्यानंतर शिबिरातील कामगिरीच्या आधारावर १७ सप्टेंबर रोजी भारतीय संघाची अंतिम निवड करण्यात येईल. या स्पर्धेसाठी मालविकाची निवड झाल्यास ती उबेर कपसाठी निवड होणारी नागपूरची तिसरी खेळाडू ठरेल. यापूर्वी अरुंधती पानतावणे आणि वैष्णवी भाले यांची उबेर कपसाठी भारतीय संघात निवड झाली होती.

अवश्य वाचा - अविश्वसनीय! विदर्भातील या गावात चक्क डायनासोर द्यायचे अंडी: काही वर्षांपूर्वी सापडले होते अवशेष

मालविका सध्या भारतीय बॅडमिंटन क्रमवारीत दुसऱ्या स्थानावर आहे. यामुळे तिची निवड पक्की मानली जात आहे. कोरोनाच्या संकटामुळे खेळाडूंनी डेन्मार्कला प्रवास करण्याचा निर्णय स्वतः घ्यायचा आहे, असे भारतीय बॅडमिंटन संघटनेने म्हटले आहे.

मालविकाने मात्र जाण्यास पसंती दर्शवली आहे. उबेर कप स्पर्धेतून भारताची विश्व ऑलिंपिक पदक विजेते पी. व्ही सिंधूने माघार घेतल्याने भारताचे नेतृत्व बहुदा साईना नेहवालकडे येण्याची शक्यता आहे. संजय मिश्रा यांच्या मार्गदर्शनाखाली सराव करणाऱ्या मालविकाने यापूर्वी अनेक आंतरराष्ट्रीय स्पर्धेत भारताचे प्रतिनिधित्व करताना उत्तम यश संपादन केले आहे.

संपादन - नीलेश डाखोरे