Ind vs Ban : बांगलादेश विरुद्ध ODI मालिकेपूर्वी टीम इंडियाला मोठा धक्का! स्टार खेळाडू बाहेर...

India vs Bangladesh ODI Series : बांगलादेशविरुद्धच्या तीन सामन्यांच्या वनडे मालिकेपूर्वी टीम इंडियाला मोठा धक्का बसला आहे. पीटीआय वृत्तसंस्थेनुसार, अनुभवी वेगवान गोलंदाज मोहम्मद शमी दुखापतीमुळे या वनडे मालिकेतून बाहेर पडला आहे. शमीच्या हाताला दुखापत झाली आहे. बीसीसीआयने अद्याप याबाबत कोणतीही अधिकृत माहिती दिलेली नाही. बांगलादेश दौऱ्यावर भारताला तीन वनडे आणि दोन कसोटी सामने खेळायचे आहेत. एकदिवसीय मालिका 4 डिसेंबरपासून म्हणजेच रविवारपासून सुरू होत आहे. शमी एकदिवसीय आणि कसोटी या दोन्ही संघांचा भाग आहे, पण दुखापतीमुळे तो 1 डिसेंबर रोजी उर्वरित भारतीय संघासोबत बांगलादेशला गेला नाही.

बीसीसीआयमधील एका सूत्राने सांगितले की, 'ऑस्ट्रेलियात झालेल्या टी-20 विश्वचषकानंतर सरावा दरम्यान मोहम्मद शमीच्या हाताला दुखापत झाली होती. त्याला NCA ला अहवाल देण्यास सांगण्यात आले आहे. टी-20 विश्वचषक 2022 नंतर शमीसह रोहित शर्मा, विराट कोहली आणि केएल राहुलसारख्या वरिष्ठ खेळाडूंना न्यूझीलंड दौऱ्यातून विश्रांती देण्यात होती. मोहम्मद सिराज, दीपक चहर, शार्दुल ठाकूर, दीपक चहर आणि युवा खेळाडू कुलदीप सेन हे चार वेगवान गोलंदाज आधीच संघात आहेत. अशा परिस्थितीत बीसीसीआय शमीच्या बदलीची घोषणा करेल अशी शक्यता कमी आहे.

दुखापत गंभीर झाल्यास शमी 14 डिसेंबरपासून सुरू होणाऱ्या दोन सामन्यांच्या कसोटी मालिकेत भाग घेऊ शकणार नाही. सूत्राने सांगितले की, 'तीन एकदिवसीय सामन्यांमध्ये शमीची अनुपस्थिती निश्चितच एक घटक आहे, परंतु सर्वात मोठी चिंतेची बाब म्हणजे कसोटी मालिका ज्यामध्ये जसप्रीत बुमराहच्या अनुपस्थितीत त्याला आक्रमणाचे नेतृत्व करावे लागेल.

एकदिवसीय मालिकेसाठी भारतीय संघ : रोहित शर्मा, केएल राहुल, शिखर धवन, विराट कोहली, रजत पाटीदार, श्रेयस अय्यर, राहुल त्रिपाठी, ऋषभ पंत, इशान किशन, शाहबाज अहमद, अक्षर पटेल, वॉशिंग्टन सुंदर, शार्दुल ठाकूर, मोहम्मद सिराज, दीपक चहर आणि कुलदीप सेन.

बांगलादेशचा भारत दौरा

• 4 डिसेंबर, पहिला एकदिवसीय (ढाका) सकाळी 11.30 वाजता

• 7 डिसेंबर, दुसरी वनडे (ढाका) सकाळी 11.30 वाजता

• 10 डिसेंबर, 3रा ODI (ढाका) सकाळी 11.30 वाजता

• 14-18 डिसेंबर, पहिली कसोटी (चटगाव)

• 22-26 डिसेंबर, दुसरी कसोटी (ढाका)