ऑलिम्पिक विजेत्या सुशील कुमारवर 1 लाखाचं बक्षीस

नवी दिल्ली : पैलवान सागर राणा हत्येप्रकरणात दिल्ली पोलिस ऑलिम्पिंक विजेत्या सुशील कुमारचा शोध घेत आहेत. दिल्लीतील छत्रसाल स्टेडियमवरील घटनेपासून सुशील कुमार फरार आहे. दिल्ली पोलिसांनी आता त्याची माहिती देणाऱ्यासाठी 1 लाख रुपयांचे बक्षीस जाहीर केले आहे. त्याच्याशिवाय त्याचा सहकारी अजय कुमार याची माहिती देणाऱ्यालाही 50 हजार रुपयांचे बक्षीस देण्यात येणार आहे. दरम्यान या सर्व प्रकरणात दिवसागणिक अडचणी वाढत असताना सुशील कुमारकडून दिल्लीच्या रोहिणी न्यायालयात अर्ज दाखल करण्यात आला आहे. आज त्यावर सुनावणी होणार आहे. (murder case delhi police eward of rs 1 lakh on wrestler sushil kumar)

दिल्लीतील कोर्टाने छत्रसाल स्टेडियमवर झालेल्या वादाच्या प्रकरणात ऑलिम्पिक पदक विजेता पैलवान सुशील कुमार (Sushil Kumar) आणि अन्य सहा जणांवर दोन दिवसांपूर्वीच अजामीनपात्र वारंट (Non-bailable warrant) जारी केले होते. पोलिसांनी यासंदर्भात माहिती दिली होती. काही दिवसांपूर्वी सुशील कुमार यांच्या विरोधात लुकआउट नोटिस जारी करण्यात आले होते. सागर राणा हत्येप्रकरणात त्याच्यावर अटकेची टांगती तलवार आहे.

दिल्लीतील छत्रसाल स्टेडियमवर 4 मे रोजी पैलवानांच्या दोन गटात हाणामारी झाली होती. यातच सागर राणाचा मृत्यू झाला. याप्रकरणात सुशीलकुमारसह सहा जणांवर प्राथमिक गुन्हा दाखल करण्यात आला होता. तेव्हापासून सुशील कुमार फरार आहे. पोलिस दिल्लीसह हरियाणा आणि अन्य ठिकाणी त्याचा शोध घेत आहेत. याप्रकरणात पोलिसांनी पीडितांची जबान नोंदवली असून सुशील कुमारचा कसून शोध सुरु आहे. अनेक ठिकाणी छापेमारीही करण्यात आलीये. हरिद्वारच्या एका आश्रमामध्ये सुशील कुमार दिसल्याचेही समोर आले होते. दिल्ली मॉडल टाउन परिसरातील एका फ्लॅटवरुन दोन्ही गटात भांडणं झाले होते. सुशील कुमारने याप्रकरणानंतर कोणत्याही पैलवानाचा हात नसल्याचे म्हटले होते. मात्र प्रकरणातील तपासादरम्यान पोलिसांच्या हाती लागलेल्या सीसीटीव्ही फुटेजमध्ये सुशील कुमार मृत सागरला मारहाण करताना दिसून आले होते.