Ranji Trophy : मुंबई अव्वल स्थानी कायम

कोलकाता : भारतातील स्थानिक क्रिकेटमधील बलाढ्य संघ म्हणून ओळखल्या जाणाऱ्या मुंबईच्या क्रिकेट संघाने रविवारी बंगालचा एक डाव व चार धावांनी पराभव करीत यंदाच्या रणजी क्रिकेट करंडकातील चौथा विजय संपादन केला.

उत्तर प्रदेशविरुद्ध झालेल्या पराभवालाही त्यांनी लीलया मागे टाकले. या विजयासह मुंबईच्या संघाने २७ गुणांसह गुणतक्तातील पहिले स्थान कायम राखले. मुंबईच्या संघाने पहिल्या डावात ४१२ धावा फटकावल्या होत्या. बंगालचा पहिला डाव शनिवारी १९९ धावांवरच आटोपला.

मुंबईच्या संघाने रविवारी त्यांना फॉलोऑन देण्याचा निर्णय घेतला. बंगालच्या फलंदाजांना दुसऱ्या डावातही चमक दाखवता आली नाही. पहिल्या डावातील शतकवीर अनुस्तुप मजुमदार या डावात १४ धावांवर बाद झाला.

अभिषेक पोरेल याने ८३ चेंडूंमध्ये १५ चौकारांसह ८२ धावांची खेळी केली, पण इतरांची साथ त्याला लाभली नाही. मध्यमगती गोलंदाज मोहित अवस्थी याने ५२ धावा देत सात फलंदाजांना पॅव्हेलियनचा रस्ता दाखवला. त्याने या लढतीत दहा फलंदाजांना बाद करीत मुंबईच्या विजयात मोलाचा वाटा उचलला.