SA vs IND 1st Test : रवी शास्त्रींच्या कर्णधाराला कानपिचक्या; रोहितने पहिल्या अर्ध्या तासात केली मोठी चूक?

SA vs IND 1st Test : भारत आणि दक्षिण आफ्रिका यांच्यात सेंच्युरियनवर होत असलेल्या पहिल्या कसोटी सामन्यात रोहितच्या नेतृत्वाखालील भारतीय संघाची कामगिरी फारशी चांगली झालेली नाही. दक्षिण आफ्रिकेने आपल्या पहिल्या डावात दुसऱ्या दिवशी दमदार फलंदाजी करत भारतीय गोलंदाजांची चांगलीच धुलाई केली.

डीन एल्गरने दमदार शतकी खेळी करत डेव्हिड बेडिंगहम सोबत 131 आणि मार्को येनसेन सोबत 111 धावांची शतकी भागीदारी रचली. या भागीदारींच्या जोरावर आफ्रिकेने पहिल्या डावात 350 पेक्षा जास्त धावा केल्या आहेत. भारताने गोलंदाजी करताना पहिल्यांदा चांगला मारा करत आफ्रिकेची अवस्था 3 बाद 113 धावा अशी केली होती. मात्र त्यानंतर भारतीय गोलंदाजांना विकेट घेणे जमले नाही.

यावरून रवी शास्त्री यांनी कर्णधार रोहित शर्माच्या रणनितीवर टीका केली. स्टार स्पोर्ट्सवर समालोचन करताना लंचनंतर भारतीय संघाने मोठी चूक केली असं सांगितलं. शास्त्री म्हणाले, 'ही गोष्ट अशी आहे ज्याच्यावर प्रशिक्षक असताना आम्ही खूप चर्चा केली आहे. कायम आम्ही आमच्या सर्वश्रेष्ठ दोन गोलंदाजांनी सत्राची सुरूवात केली आहे. जुम्ही मागे वळून पाहिलं तर भारताने लंचनंतर पहिल्या अर्ध्या तासात एक मोठी चूक केली. ज्या दोन गोलंदाजांद्वारे सुरूवात केली ती एक मोठी चूक होती.'