Babar Azam : बाबरने इंझमामचे रेकॉर्ड मोडले; खूष झालेला आफ्रिदी म्हणतो...

गाले : श्रीलंका आणि पाकिस्तान (Sri Lanka Vs Pakistan) यांच्यात सुरू असलेल्या पहिल्या कसोटी सामन्यात पाकिस्तानचा कर्णधार बाबर आझमने (Babar Azam) पहिल्या डावात 119 धावांची झुंजार शतकी खेळी केली. त्याचे हे कसोटी क्रिकेटमधील 7 वे शतक होते. त्याने आपल्या खेळीने पुन्हा एकदा सिद्ध करून दाखवले की तो जागतिक स्तरावरील अव्वल फलंदाजांपैकी एक आहे. बाबर आझमचे कौतुक पाकिस्तानचे सर्व खेळाडू करतात त्याने कर्णधार म्हणून एक खास विक्रम केल्यानंतर शाहिद आफ्रिदीने (Shahid Afridi) त्याच्यावर स्तुतीसुमने उधळली आहेत.

शाहिद आफ्रिदीने पाकिस्तान क्रिकेट बोर्डाचे ट्विट शेअर करत लिहिले की, 'बाबरने पुन्हा एकदा दबावाच्या क्षणी एक असाधारण खेळी खेळून आपले क्षमता सिद्ध केली आहे. सामन्यात नसीमद्वारा त्याला चांगली साथ मिळाली. शाहीन आणि इतर गोलंदाजांना आता श्रीलंकेला कमी धावात रोखून पाकिस्तानचा विजय निश्चित करावा. एक उत्कृष्ट कसोटी सामना जे पहायलाच हवा.'

बाबर आझमने या शतकाबरोबरच पाकिस्तानकडून कर्णधार (Captain) म्हणून सर्वात कमी डाव खेळत 9 शतके (Century) ठोण्याचा विक्रम केला. त्याने या यादीत इंझमाम - उल - हकला (Inzamam-ul-Haq) देखील मागे टाकले. इंझमामने कर्णधार असताना 131 डावात 9 आंतरराष्ट्रीय शतके केली होती. मिसबाह - उल - हकने 189 डावात 7 तर इमरान खान यांनी 186 डावात 6 शतके केली होती.

याचबरोबर बाबर आझमने आपल्या कारकिर्दितील 10,000 आंतरराष्ट्रीय धावा देखील पूर्ण केले. तो पाकिस्तानचा आणि आशियातील सर्वात वेगाने 10,000 धावा करणारा फलंदाज ठरला आहे. श्रीलंकेविरूद्धच्या कसोटी सामन्याबद्दल बोलायचे झाले तर श्रीलंकेने पहिल्या डावात 222 धावा केल्या होत्या. त्याच्या प्रत्युत्तरात पाकिस्तानने 218 धावा केल्या. पहिल्या डावात 4 धावांची आघाडी घेणाऱ्या श्रीलंकेने दुसऱ्या डावात तिसऱ्या दिवसाच्या तिसऱ्या सत्रापर्यंत 8 बाद 282 धावा केल्या आहेत. लंकेकडे सध्या 286 धावांची आघाडी आहे.