Virat Kohli : मानलं! सराव सामन्यातही विराटची जीव तोडून फिल्डिंग

Virat Kohli Video : टी-20 विश्वचषकाच्या सराव सामन्यात भारताने ऑस्ट्रेलियाचा सहा धावांनी पराभव केला. सराव सामन्यात कोहलीने अप्रतिम क्षेत्ररक्षण करताना सामना भारताच्या बाजूने वळवला. त्याने आपल्या उत्कृष्ट क्षेत्ररक्षणाने एकदा नव्हे तर दोनदा ऑस्ट्रेलियन फलंदाजांना चकित केले. प्रथम फलंदाजी करताना भारताने 20 षटकांत 7 गडी गमावून 186 धावा केल्या. केएल राहुलने 33 चेंडूत 57 धावा आणि सूर्यकुमार यादवने 33 चेंडूत 50 धावा केल्या. प्रत्युत्तरात ऑस्ट्रेलियन संघ डेथ ओव्हर्समध्ये भारताच्या उत्कृष्ट गोलंदाजी आणि क्षेत्ररक्षणाच्या बदल्यात 20 षटकांत 180 धावांवर सर्वबाद झाला.

19व्या षटकाच्या दुसऱ्या चेंडूवर जोश इंग्लिसला हलक्या हाताने फटका खेळून एक धाव घेत होता. जेणेकरून टिम डेव्हिडला स्ट्राइक मिळू शकेल. पण विराट कोहलीने चेंडू पटकन पकडला आणि तो थेट स्टंपवर फेकला. कोहलीच्या या धावबादमुळे धोकादायक फलंदाज टीम डेव्हिड 2 चेंडूत 5 धावा करून पॅव्हेलियनमध्ये परतला. टीम डेव्हिड शेवटपर्यंत टिकला असता तर ऑस्ट्रेलिया हा सामना जिंकू शकला असता.

शेवटच्या षटकात शमीच्या तिसऱ्या चेंडूवर पॅट कमिन्सने समोरून शॉट मारला. लाँग ऑनच्या दिशेने उभ्या असलेल्या विराट कोहलीने एका हाताने हवेत उडी मारत अप्रतिम झेल घेतला. कोहलीचा हा प्रयत्न पाहून पॅट कमिन्ससह सर्वांनाच आश्चर्य वाटले.