कमालीचा योगायोग; तिचा अन् ऋतूराजचा बर्थडे एकाच दिवशी

भारतीय क्रिकेटमधील युवा आणि मराठमोळा चेहरा ऋतूराज गायकवाड आपल्या दमदार कामगिरीनं सर्वांचे लक्ष वेधून घेताना दिसतो. आयपीएलमध्ये चेन्नई सुपर किंग्जकडून खेळणाऱ्या ऋतूराजनं अल्पावधीच आपली वेगळी ओळख बनवलीये. चेन्नई सुपर किंग्जनं आपल्या अधिकृत अकाउंटवरुन ऋतूराज गायकवाडला 25 व्या वाढदिवसाच्या (Rutruraj Gaikwad Birthday) खास शुभेच्छा दिल्यात. एक विशेष गोष्ट म्हणजे आणखी एका सेलिब्रिटीचाही आज वाढदिवस आहे. आणि ते नाव आहे अभिनेत्री सायली संजीव (Sayali Sanjeev)

गेल्या वर्षभरातील कामगिरीमुळे स्टार बनलेल्या ऋतूराज गायकवाडवर (Rutruraj Gaikwad) अनेक तरुणी फिदा आहेत. यात चर्चेचा विषय ठरला होता तो म्हणजे सायली संजीवनं (Sayali Sanjeev) ऋतूराज गायकवाडला क्लीन बोल्ड केल्याचा. सायली संजीव ही सोशल मीडियावर चांगलीच सक्रीय असते. वेगवेगळ्या अंदाजातील खास फोटो ती सोशल मीडियाच्या माध्यमातून शेअर करत असते. ऋतूराज गायकवाडने तिच्या एका फोटोवर व्वा...अशी कमेंट केली होती. सायलीनेही त्याला हार्टवाल्या इमोजीनं रिप्लाय दिला आणि दोघांच्यात प्रेमाचा खेळ रंगल्याची चर्चा रंगण्यास सुरुवात झाली.

31 जानेवारी 1997 मध्ये पुण्यात ऋतूराजचा जन्म झाला. त्याने (Ruturaj Gaikwad) ने मागील वर्षभरात देशांतर्गत क्रिकेटसह आयपीएलमध्ये आपला दबदबा दाखवून दिला आहे. देशांतर्गत क्रिकेटमधील शतकी खेळीच्या जोरावर त्याने टीम इंडियात स्थान मिळवले. ऋतूराज गायकवाड आता महेंद्र सिंह धोनीच्या (MS Dhoni) चेन्नई सुपर किंग्जचा स्टार खेळाडू आहे. आयपीएलच्या आगामी हंगामापूर्वी चेन्नईने त्याला रिटेन करत त्याचा पुरावाही दिला आहे.

ऋतूराज गायकवाडसोबत जिची चर्चा रंगली होती त्या सायली संजीवचा जन्मही 31 जानेवारीचाच. हा एक कमालीचा योगायोगच म्हणावा लागेल. सायलीही ऋतूराजपेक्षा चार वर्षांनी मोठी आहे. झी मराठीवरील 'काहे दिया परदेस' ही तिची मालिका प्रचंड गाजली होती. मुळची धुळे खानदेशातील तारकेनं चित्रपटातही काम केले आहे. ऋतूराजला तिने क्लीन बोल्ड केल्याची चर्चा चांगलीच रंगली होती. त्यानंतर ऋतूराजने मात्र डिफेन्सिव शॉट खेळावा तशी प्रतिक्रिया दिल्याचे पाहायला मिळाले. माझी विकेट फक्त गोलंदाज घेऊ शकतो, असा रिप्लाय देत ऋतूराजनं सायलीसोबत पार्टनरशिपच्या चर्चेला ब्रेक दिला होता.