WPL 2023 : आरसीबीने लावला पराभवाचा 'पंजा', शेवटच्या षटकापर्यंत रंगलेल्या सामन्यात दिल्लीचा विजय

WPL 2023 DC vs RCB : महिला प्रीमियर लीगच्या 11व्या सामन्यात दिल्ली कॅपिटल्सने रॉयल चॅलेंजर्स बंगळुरूचा सहा गडी राखून पराभव केला. यासह आरसीबीने पराभवाचा 'पंजा' लावला. शेवटच्या षटकापर्यंत रंगलेल्या या सामन्यात दिल्लीचा विजय झाला. नाणेफेक हारल्यानंतर प्रथम फलंदाजी करताना बंगळुरूने 20 षटकांत 4 गडी गमावून 150 धावा केल्या. प्रत्युत्तरात दिल्लीने 19.4 षटकांत चार गडी गमावून लक्ष्य गाठले.

बंगळुरू संघाचा हा सलग पाचवा पराभव आहे. या लीगमध्ये संघाला अद्याप एकही सामना जिंकता आलेला नाही आणि गुणतालिकेत ते तळाच्या पाचव्या स्थानावर आहे. त्याचबरोबर दिल्ली संघाचा पाच सामन्यांतील हा चौथा विजय आहे. मुंबईविरुद्धचा एकमेव सामना दिल्ली हरला आहे. दिल्लीचा संघ गुणतालिकेत दुसऱ्या स्थानावर आहे.

प्रथम फलंदाजी करताना रॉयल चॅलेंजर्स बंगळुरूने दिल्ली कॅपिटल्ससमोर 151 धावांचे लक्ष्य ठेवले होते. आरसीबीने 20 षटकांत चार गडी गमावून 150 धावा केल्या होत्या. बेंगळुरूकडून एलिस पेरीने 52 चेंडूत 67 धावांची नाबाद खेळी खेळली. याशिवाय रिचा घोषने 16 चेंडूत 37 धावा केल्या. या दोघांशिवाय एकाही फलंदाजाला विशेष काही करता आले नाही. कर्णधार स्मृती मानधना पुन्हा एकदा अपयशी ठरली आणि 15 चेंडूत आठ धावा करून बाद झाली. शेवटच्या पाच षटकात पेरीच्या बळावर आरसीबीने 70 धावा केल्या आणि एक विकेट गमावली. दिल्लीकडून शिखाने तीन आणि नॉरिसने एक विकेट घेतली.

151 धावांच्या लक्ष्याचा पाठलाग करताना दिल्ली संघाची सुरुवात खराब झाली. शेफाली वर्मा पहिल्याच षटकात बाद झाली. मेगन शुटने त्याला क्लीन बोल्ड केले. शेफालीला खातेही उघडता आले नाही. यानंतर मेग लॅनिंग आणि अॅलिस कॅप्सीने दुसऱ्या विकेटसाठी 44 धावांची भागीदारी केली.

कॅप्सी 24 चेंडूंत आठ चौकारांच्या मदतीने 38 धावा करून बाद झाली. कर्णधार मेग लॅनिंग काही विशेष करू शकली नाही आणि 18 चेंडूत 15 धावा करून बाद झाली. यानंतर जेमिमा रॉड्रिग्ज आणि मारिजाने कॅप यांनी चौथ्या विकेटसाठी 39 धावांची भागीदारी केली. जेमिमा 28 चेंडूत 32 धावा करून बाद झाली. यानंतर कॅप आणि जेस जोनासेन यांनी एकत्र येऊन दिल्ली संघाला विजय मिळवून दिला.

शेवटच्या षटकात दिल्लीला विजयासाठी नऊ धावांची गरज होती आणि चेंडू होता रेणुका सिंगच्या हातात. पहिल्या दोन चेंडूंवर दोन धावा झाल्या. जोनासेनने तिसऱ्या चेंडूवर षटकार ठोकला. चौथ्या चेंडूवर जोनासेनने चौकार मारून संघाला विजय मिळवून दिला. मारिजाने कॅपने 32 चेंडूत 32 धावा करून नाबाद राहिले आणि जोनासेनने 15 चेंडूत 29 धावा केल्या. बंगळुरूकडून आशा शोभनाने दोन गडी बाद केले. त्याचवेळी मेगन शुट आणि प्रीती बोस यांना प्रत्येकी एक विकेट मिळाली.