Childrens Day 2023 : पंडित जवाहरलाल नेहरू यांच्या जन्मदिनीच बालदिन का साजरा केला जातो?

Childrens Day 2023 : भारतात दर वर्षी १४ नोव्हेंबरला बालदिन साजरा केला जातो. भारताचे पहिले पंतप्रधान पंडित जवाहरलाल नेहरू यांच्या जयंतीच्या दिवशीच हा बालदिन देशभरात साजरा केला जातो.

जगभरातील इतर देशांमध्ये बालदिन हा वेगवेगळ्या दिवशी साजरा केला जातो. मात्र, भारतात बालदिन हा १४ नोव्हेंबरलाच साजरा केला जातो. त्यानिमित्ताने देशभरातील शाळांमध्ये मुलांसाठी विविध प्रकारचे कार्यक्रम आणि स्पर्धा ठेवल्या जातात.

परंतु, हा बालदिन १४ नोव्हेंबरला पंडित जवाहरलाल नेहरू यांच्या जन्मदिनानिमित्त का साजरा केला जातो? हे तुम्हाला माहित आहे का? चला तर मग जाणून घेऊयात.

बालदिन १४ नोव्हेंबरलाच का साजरा केला जातो ?

भारताचे पहिले पंतप्रधान पंडित जवाहरलाल नेहरू यांना लहान मुलांबद्दल विशेष प्रेम होते. त्यांना नेहमीच लहान मुलांमध्ये रमायला आवडायचे. लहान मुले पंडितजींना आवडीने ‘चाचा नेहरू’ म्हणायची. भारताला स्वातंत्र्य मिळाल्यानंतर नेहरूंनी लहान मुलांचे आणि तरूणांचे हक्क आणि त्यांच्या शिक्षणासाठी भरपूर काम केले होते.

लहान मुलांचे हक्क आणि तरूण यांना सर्व प्रकाराचे ज्ञान हे सहज प्राप्त होईल अशी शिक्षण प्रणाली निर्माण करण्याचे नेहरू हे पुरस्कर्ते होते. १९६४ मध्ये पंडित जवाहरलाल नेहरू यांचे निधन झाले.

पंडित जवाहरलाल नेहरू यांच्या निधनानंतर त्यांचा वाढदिवस हा बालदिन म्हणून साजरा करण्याचा ठराव भारतीय संसदेमध्ये मंजूर करण्यात आला आणि तेव्हापासूनच त्यांचा जन्मदिन हा बालदिन म्हणून भारतात साजरा केला जातो.

बालदिन साजरा करण्यामागचा हेतू काय ?

बालदिन हा साजरा करण्यामागचा प्रमुख हेतू हा आहे की, लहान मुलांचे हक्क, अधिकार आणि शिक्षण याबद्दल समाजात जागरूकता निर्माण करणे. एकदा पंडित जवाहरलाल नेहरू म्हणाले होते की, ‘आजची मुले ही उद्याचा भारत घडवतील, आपण ज्या प्रकारे त्यांचे पालनपोषण करू त्याप्रकारे आपल्या देशाचे भविष्य निश्चित होईल.’