ओसंडून वाहणारा ईमेल बॉक्स रिकामी करण्यासाठी सोप्पा उपाय

मुंबई : वैयक्तिक आणि व्यावसायिक कारणांसाठी जीमेलचा वापर मोठ्या प्रमाणावर केला जातो; मात्र अनेकदा हजारो ईमेल्स साठून राहिल्याने मेलबॉक्समधील जागा भरते व नवीन ईमेल्स मिळवण्यात अडचणी येतात. अशावेळी अनावश्यक ईमेल्स नाहीसे करून जागा कशी रिकामी करावी हे पाहू या…

जीमेलमधील फिल्टर हा पर्याय वापरून हजारो अनावश्यक ईमेल्स एकदम नाहीसे करता येतात. शोधपट्टीच्या (सर्च बार) उजव्या कोपऱ्यात हा ‘फिल्टर’ (filtre) पर्याय असतो. त्यावर क्लिक केल्यानंतर फ्रॉम असा शब्द दिसेल. त्याच्या पुढे असा एखादा ईमेल आयडी लिहावा ज्यावरून तुम्हाला सातत्याने शेकडो अनावश्यक ईमेल्स प्राप्त होत असतात.

त्यानंतर सर्च बटणावर क्लिक केल्यास संबंधित ईमेल आयडीवरून आलेले सर्व ईमेल्स स्क्रीनवर दिसतील. शोधपट्टीच्या खाली डाव्या बाजूला एक छोटा चौकोन दिसेल. त्यावर क्लिक केल्यास सर्व ईमेल्स निवडले जातील. ते तुम्ही डिलिट बटणाद्वारे नाहीसे करू शकता. भ्रमणध्वनीवरील ईमेल नाहीसे करण्यासाठीही हीच प्रक्रिया करावी.

थोडेफार ईमेल्स नाहीसे करायचे असल्यास तुम्ही ते एकेक करून डिलीट करू शकता. हजारो ईमेल्स डिलीट करण्यासाठी मात्र फिल्टर पर्याय वापरणेच अधिक सोयीचे ठरेल.