Lok Sabha Election 2024: चला मतदान करू या, समृद्ध भारत घडवू या

Lok Sabha Election 2024

मतदानाचा टक्का वाढावा यासाठी प्रशासनाच्या खांद्याला खांदा लावून ज्युनिअर चार्ली चॅप्लिन फाऊंडेशनने मतदान करा हे सांगण्यासाठी राज्यभर अभियान सुरु केले आहे. मुंबई, पुणे येथून सुरवात केलेल्या अभियानामध्ये दोन दिवसांपासून छत्रपती संभाजीनगराच्या विविध भागात ज्युनिअर चार्ली टीम मतदान करा हे सांगत आपल्या अभिनयाने लोकांना आकर्षित करत आहे.

लोकसभा निवडणुकीत घटलेला टक्का लक्षात घेता, निवडणूक आयोग आणि प्रशासन प्रचार आणि प्रसारात गुंतले आहे. या कामात प्रत्येकाचा सहभाग आवश्यक आहे. यासाठी ज्युनिअर चार्ली चॅप्लिन फाऊंडेशनच्या ११ चार्लीच्या टीमने मतदान करा हे सांगण्यासाठी शहरातील गुरुवारी (ता. २५) क्रांती चौक येथून अभियानाला सुरवात केली.

सहायक पोलिस आयुक्त संपत शिंदे यांनी हिरवा झेंडा दाखवून मोहिमेचे उद्‍घाटन केले. त्यानंतर शहरातील विविध भागात, पोलिस ठाण्यात, मॉलमध्ये, दुकानांमध्ये, बाजारपेठेत अशा अनेक ठिकाणी जावून मतदान करण्याचे आवाहन केले. ज्युनिअर चार्लीच्या मूक अभिनयातून आणि हातात फलक घेत मतदान करा, मतदानाची सुटी एन्जॉय करण्यासाठी नाही, लोकशाही बळकट करा असे आवाहन केले जात आहे.