General Knowledge : पाल सलग पळताना कधीच का दिसत नाही? थांबत थांबत का चालते?

पालीचं नाव घेतलं की अनेकजण तोंडं वाकडी करतात. घराच्या भिंतीवर किंवा छतावर असलेल्या पाली पाहून अनेकदा आपल्याला अस्वस्थ होतं, भिती वाटते. पाली घराच्या कानाकोपऱ्यातले कीटक खातात, पण तरी त्या पाहून आपल्याला घृणा निर्माण होते.

पण तुम्ही कधी बारकाईने पाहिलं आहे का? पाल कधीच सरळ नुसती पळत नाही. ती थांबते, मग थोडावेळ चालते, पुन्हा थांबते. घराच्या भिंतीवर बसलेल्या पालीच्या हालचाली तुम्ही कधीतरी पाहिल्या असतीलच, मग ती कीटक पकडण्यासाठी वेगाने धावत येते आणि पकडते हे तुम्ही पाहिले असेलच, पण पाल वेगाने फिरते हे क्वचितच लक्षात आले असेल.

हे पाहून लोक तिला घाबरतात, आता ती आमच्याकडे एकटक पाहत आहे आणि आमच्यावर तुटून पडेल असा सगळ्यांनाच वाटत असेल. वास्तविक, पालीच्या डोळ्यांवर पापण्या नसतात, त्यामुळे हा प्राणी आणखीनच भयानक दिसतो.

पाल खूप वेगाने धावते, परंतु ती सतत धावू शकत नाही, कारण तिला श्वास घेण्यासाठी थांबावे लागते. पाल एका वेळी फक्त एकच काम करू शकते, अशावेळी ती एकतर धावू शकते किंवा श्वास घेऊ शकते. त्यामुळे धावताना श्वास घेण्यासाठी तिला मध्येच थांबावे लागते.

हेच कारण आहे की पाल आपल्या भक्ष्यावर खूप वेगाने झेपावते आणि भक्ष सोडून पळून गेला तर त्याचा पाठलाग करत नाही. पाली ३० वर्षांपर्यंत जगू शकतात. धोक्याची जाणीव झाली की ती आपली शेपटी शरीरापासून वेगळे करू शकते, परंतु नंतर तिची शेपटी पुन्हा वाढते.