Shirur Loksabha Constituency : आढळरावांच्या संपत्तीत १० कोटींनी वाढ

शिवाजीराव आढळराव पाटील, उमेदवार, राष्ट्रवादी काँग्रेस

पुणे : शिरूर लोकसभा मतदारसंघातील महायुतीचे राष्ट्रवादी कॉँग्रेसचे उमेदवार शिवाजीराव आढळराव पाटील यांच्या कुटुंबीयांकडे एकूण ३९ कोटी ६८ लाख रुपयांची जंगम आणि स्थावर मालमत्ता आहे. त्यांच्या कुटुंबीयांच्या नावावर १ कोटी ५१ लाख ४६ हजार रुपयांचे कर्ज आहे. मागील पाच वर्षांत त्यांच्या संपत्तीत मोठी वाढ झाली आहे.

मागील लोकसभा निवडणुकीत आढळराव पाटील यांनी शिवसेनेकडून याच मतदारसंघातून निवडणूक लढविली होती. त्या वेळी त्यांनी उमेदवारी अर्जासोबत दाखल केलेल्या शपथपत्रात त्यांच्या कुटुंबीयांच्या नावावर २९ कोटी १ लाख ६५ हजार ५५१ रुपयांची स्थावर व जंगम मालमत्ता होती. आज त्यांनी राष्ट्रवादी कॉंग्रेस पक्षातर्फे उमेदवारी अर्ज दाखल केला. या वेळी दाखल केलेल्या शपथपत्रात त्यांच्या कुटुंबीयांकडे ३९ कोटी ६८ लाखांची एकूण मालमत्ता असल्याचे नमूद केले आहे.

आढळराव-पाटील यांच्यावर पुण्यासह चाकण, शिक्रापूर, भोसरी आणि आंबेगाव या पाच ठिकाणी गुन्हे दाखल आहेत. त्यांच्याकडे ७ कोटी ४९ लाख ६६ हजार रुपयांची, तर त्यांची पत्नी कल्पना यांच्या नावावर ३ कोटी ४७ लाख १ हजार ५५८ एवढी स्थावर मालमत्ता आहे. त्यांच्याकडे एकूण २ कोटी ७६ लाख ३ हजार ८३७, तर त्यांची पत्नीच्या नावावर २ कोटी ९१ लाख ३२ हजार रुपयांची जंगम मालमत्ता आहे. आढळराव यांच्या विविध बँक खात्यांमध्ये १ कोटी ३ लाख ६९ हजार रुपयांच्या ठेवी आहेत, तर ६ लाख ६८ हजार ४३५ रुपयांचे विविध कंपन्यांचे शेअर्स आहेत. त्यांच्याकडे एकच मोटार आहे.