'दिवाळीनंतर बॉम्ब मी फोडेन', फडणवीसांचा नवाब मलिक यांना इशारा

मुंबई: माजी मुख्यमंत्री देवेंद्र फडणवीस (Devendra fadnavis) यांचे ड्रग्स पेडलरसोबत (Drug peddlar) संबंध असल्याचा खळबळजनक आरोप राष्ट्रवादी काँग्रेसचे नेते (Ncp) आणि प्रवक्ते नवाब मलिक (Nawab malik) यांनी केला. त्याला आता देवेंद्र फडणवीस यांनी उत्तर दिलं आहे. "नवाब मलिक यांनी दिवाळीच्या दिवशी लंवगी-फटाका लावला आहे. लक्षात ठेवा नवाब मलिक दिवाळी झाल्यावर बॉम्ब मी फोडेन" असा थेट इशाराच देवेंद्र फडणवीस यांनी दिला आहे.

"मी काचेच्या घरात राहत नाही. ज्यांचे अंडरवर्ल्डशी संबंध आहेत, अशा लोकांनी माझ्याशी, ड्रग्ज संदर्भात बोलू नये" असे फडणवीस म्हणाले. "सगळे पुरावे आपल्यासमोर मांडेन. राष्ट्रवादी काँग्रेसचे अध्यक्ष शरद पवार यांना नवाब मलिकांचे अंडरवर्ल्डशी असलेल्या सगळ्या संबंधाचे पुरावे देईन. त्यामुळे दिवाळी संपण्याची वाट बघा, त्यांनी सुरुवात केली आहे, याला अंतापर्यंत न्यावच लागेल" असे फडणवीस म्हणाले.

"या सगळ्यामध्ये नवाब मलिक यांना आपल्या जावयाचे आरोपपत्र कमकुवत करायचे आहे. NCB अधिकाऱ्यांवर दबाव आणून, या सगळ्यातून सुटण्यासाठी मदत करावी, यासाठी हे सर्व सुरु आहे. पण कायदा सक्षम आहे" असे देवेंद्र फडणवीस यांनी सांगितले.