Ajit Pawar: पहाटेच्या शपथविधीच्या आत्मचरित्रातील उल्लेखावर अजित पवारांची प्रतिक्रिया, म्हणाले 'मी...'

अजित पवार यांनी भाजपसोबत जात पहाटे उपमुख्यमंत्रीपदाची शपथ का घेतली? त्यानंतर अजित अजित पवार यांचं बंड कसं थोपवलं याचा सविस्तर उल्लेख शरद पवार यांचं आत्मचरित्र लोक माझे सांगाती' मध्ये करण्यात आला आहे. अजित पवार यांना याबाबत विचारलं असता मी पुस्तक वाचलं नसल्याचं त्यांनी म्हटलं आहे.

अजित पवार यांनी पहाटेच्या शपथविधीवर बोलणं टाळलं आहे. अजित पवार यांनी म्हटलं की, लोक माझे सांगाती पुस्तक मी अद्याप वाचलेलं नाही. त्यामुळे मला याबाबत काहीच माहित नाही. मी पुस्तक वाचून याबाबत सविस्तर प्रतिक्रिया देईल, असं अजित पवारांनी म्हटलं आहे.

काय म्हणालेत अजित पवार?

मी अजून पुस्तक वाचलेलं नाही. मला काही चर्चा माहीती नाही. कालपर्यंत मी बाहेरच होतो. आलो तसाच सभेला गेलो. सभेवरून रात्री उशीरा आलो. मला पहिल्यांदा पुस्तक वाचू देत मी पुस्तक वाचलं की मी बोलेन. मला काही माहीत नसताना मी प्रतिक्रिया दिली की त्याच्या वेगळ्या बातम्या येतात. त्यामुळे मी आधी पुस्तक वाचतो. त्यानंतर प्रतिक्रीया देतो असंही पवार यावेळी म्हणाले आहेत.

पहाटेच्या शपथविधीमागे खरंच हात होता? पुस्तकात शरद पवारांचा मोठा खुलासा

या शपथविधीमागे शरद पवारांचाच हात आहे, अशी चर्चा सुरू होती. काही दिवसांपूर्वी राष्ट्रवादीचे प्रदेशाध्यक्ष जयंत पाटील यांनी देखील अप्रत्यक्षरित्या पहाटेच्या शपथविधीमागे शरद पवार यांचा हात असल्याचं वक्तव्य केलं होतं. यामुळे चर्चेला उधाण आलं. शरद पवार यांनी मात्र याबाबत कधीच कोणती प्रतिक्रिया दिली नाही. परंतु आता त्यांनी आपल्या पुस्तकात याबाबत खुलासा केला आहे. अजित पवारांचा पहाटेचा शपथविधी समजल्यावर धक्का बसल्याची कबुली शरद पवार यांनी आपल्या लोक माझे सांगती पुस्तकाच्या दुसऱ्या भागात दिली आहे.