Ajit Pawar : "बोलवा त्या गौतमी पाटीलला..."; भाषणात पवारांचा कार्यकर्त्यांना मिश्कील सल्ला

राज्याचे विरोधी पक्षनेते अजित पवार आपल्या मिश्किल आणि सडेतोड शैलीसाठी प्रसिद्ध आहेत. त्यांच्या याच वक्तृत्वशैलीचा पुन्हा एकदा प्रत्यय आला आहे. गौतमी पाटीलला यात्रेला बोलवा असं पवारांनी म्हणताच कार्यकर्त्यांमध्ये मात्र चांगलाच हशा पिकला.

कृषी उत्पन्न बाजार समितीच्या निवडणुकांच्या पार्श्वभूमीवर आयोजित कार्यकर्ता मेळाव्यात अजित पवार बोलत होते. राष्ट्रवादी पुरस्कृत रयत पॅनेलच्या माध्यमातून हा मेळावा भरवण्यात आला होता. या कार्यक्रमात बोलताना अजित पवारांनी आपल्याबद्दल उठणाऱ्या वावड्यांवरही भाष्य केलं आहे.

अजित पवार म्हणाले, "माझ्याबद्दल अनेक बातम्या पसरवण्याचं काम सध्या सुरू आहे. जरा कुठं गेलं की पत्रकार म्हणतात, अजित पवार नॉट रिचेबल. माझ्यामागे हे का लागलेत बाबा. एखाद्याच्या किती मागे लागायचं. मी असं का बोलतो, विचारतात. मला येतं ते मी बोलतो. लोकांना वाटतं २०१९ ला केलं तसं करीन का काय. पण मी पुन्हा एकदा सांगतो मी कायम राष्ट्रवादीतच राहणार आहे.

अजित पवारांनी या कार्यकर्त्यांना मतदान करण्याचं आवाहनही केलं आहे. यावेळी पवारांनी गौतमी पाटीलचा उल्लेख केला आहे. अजित पवार म्हणाले, "दिवसा मतदान करा, यात्रा - जत्रा काय ते रात्री, काय कापाकापी करायची ती करा. काय तमाशा बघायचा तो रात्री बघा. बोलवा त्या पाटील बाईला...काय नाव.हा गौतमी पाटील. बोलवा." अजित पवारांच्या या विधानानंतर उपस्थितांमध्ये हास्याची लाट उमटली.