OBC विधेयक सोमवारी पटलावर मांडू; अजितदादांची विधानसभेत ग्वाही

मुंबई: महाराष्ट्राच्या विधानसभेमध्ये आज ओबीसी आरक्षणाच्या मुद्यावरुनच मोठा गोंधळ झालेला पहायला मिळाला. हे सरकार या आरक्षणासंदर्भात गाफील असल्याचा आरोप विरोधकांनी केला आहे, तर आम्ही पुरेपुर प्रयत्न करत असून कायदेशीर बाबींमुळे या अडचणी येत असल्याचं सरकारकडून सांगण्यात येत आहे. आपण दोन्ही बाजूंनी ओबीसींसाठी पुन्हा प्रयत्न करु. आरक्षणाशिवाय निवडणुका होणार नाहीत, हे देखील सरकारकडून स्पष्ट करण्यात आलंय. यासंदर्भातच आता उपमुख्यमंत्री अजित पवार यांनी आश्वासन देत म्हटलंय की, ओबीसी अरक्षणाबाबत आम्ही विधेयक तयार करत आहोत, ते सोमवारी पटलावर मांडू. या प्रश्नावर मार्ग निघावं हीच इच्छा आहे, अशी माहिती अजित पवार यांनी दिली आहे.

पुढे त्यांनी म्हटलंय की, आम्ही मध्य प्रदेशबाबतची उदाहरणे मांडली आहेत. त्यांच्याकडूनही माहिती मागवली आहेत. त्यांना कशाप्रकारे फायदा झाला, ते पाहून त्याचप्रकारचं बिल आम्ही तयार करतोय. त्यासाठी आज कॅबिनेटमध्ये मंजूरी देतोय. सोमवारी सभागृहात दाखवणार आहे. ते मागच्या वेळेप्रमाणेच मंजूर करुन घेऊ. त्यानंतर आपण निवडणूक आयोगाला कळवू. मागे आपण आरक्षणासाठी सगळं काही केलं पण कायद्याने तो निवडणूक आयोगाचा अधिकार आहे. त्याला आपण काही करु शकत नाही. मग उगाच असा गैरसमज होतो की आमच्यावर कुणाचा तरी दबाव आहे पण, आमच्यावर कुणाचाही दबाव नाही. आणि आम्ही कुणाच्या दबावाला भीक घालू शकत नाही.

हवं तर स्थानिक स्वराज संस्थांवर प्रशासक ठेवू पण ओबीसी आरक्षणासहितच निवडणूका घेऊ. आज संध्याकाळी मंत्रिमंडळ बैठकी नंतर उद्या बिल आणू, असं आश्वासन अजित पवार यांनी सांगितलंय.