Ajit Pawar : सेलिब्रिटींना राजकारणात का आणलं जातं? अमोल कोल्हेंबद्दल अजित पवार रोखठोक बोलले

Ajit Pawar on Amol Kolhe : राज्याचे उपमुख्यमंत्री अजित पवार यांनी शिरुर लोकसभा मतदारसंघाचे खासदार अमोल कोल्हे यांचा चांगलाच समाचार घेतला आहे. सेलिब्रिटी लोकांना आम्ही राजकारणात का आणतो? याबद्दल अजित पवारांनी खुलासा केला.

शिरुर लोकसभा मतदारसंघाच्या दौऱ्यावर असताना जाहीर कार्यक्रमामध्ये अजित पवार बोलत होते. ते म्हणाले की, आम्ही नेमकं वेगळं (शरद पवारांपासून) का झालो, याबद्दल अजूनही लोकांच्या मनात शंका आहे. पण तुम्ही मनात वेगळं काही आणू नका.. आपण इकडं आहोत ते तिकडं आहेत.

''मीच तुमच्याकडे डॉक्टर अमोल कोल्हेंना मतदान करा, अशी विनंती करायला यायचो. मी त्यांना दुसऱ्या पक्षातून घेऊन माझ्या घरी नेऊन पक्षप्रवेश देत तिकीट दिलं होतं. मी आणि दिलीपराव वळसे पाटलांनी जबाबदारी घेतली होती. माझ्यावर भोसरी, शिरुर आणि हडपसरची जबाबदारी होती. आपण हे सीट निवडून आणलं होतं. मला वाटलं वक्तृत्व चांगलं आहे, दिसायला राजबिंडा आहे. चांगलं काम करील..''

अजित पवार पुढे बोलले की, नंतर दोन वर्षे झाली की ते (अमोल कोल्हे) म्हणाले-दादा मला राजीनामा द्यायचाय. मी म्हटलो, जनतेने पाचवर्षांसाठी निवडून दिलं आणि दोनच वर्षात राजीनामा कसा द्यायचा? लोक जोड्याने मारतील. त्यावर ते (अमोल कोल्हे) म्हणाले, मी कलावंत आहे, माझी नाटकं, चित्रपट, व्यवसाय यावर परिणाम होतो. मी सेलिब्रिटी आहे लोकांना वाटतं रोज मतदारसंघात यावं. पण माझी कामं असतात, यामुळे माझ्या व्यवसायावर परिणाम झाला आहे.

''असे त्यांचे शब्द होते. पण मी म्हटलो, तसं करु नका खराब दिसेल. कसंबसं करत त्यावेळी त्यांना समजावलं होतं. खरंतर त्यांचा राजकाराणाचा पिंडच नाही. एखादा उमेदवार पराभूत करता येत नसेल तर आम्ही राजकीय लोक सेलिब्रिटींना उमेदवारी देत असतो. यात आमच्याही चुका आहे. या लोकांना राजकीय जाण आहे का, विकास कळतो का.. हे बघितलं पाहिजे.'' असं म्हणत अजित पवारांनी खासदार अमोल कोल्हेंचा चांगलाच खरपूस समाचार घेतला.