अनिल देशमुख गौप्यस्फोट | परमबीर माझ्यासमोर थरथर कापत होते

मुंबई : ‘‘ ज्येष्ठ उद्योगपती मुकेश अंबानी यांच्या मुंबईतील ‘अँटिलिया’ या निवासस्थानाबाहेर स्फोटकांनी भरलेली मोटार सापडल्या प्रकरणी माहिती देत असताना मुंबईचे माजी पोलिस आयुक्त परमबीर सिंह (Parambir Singh) हे थरथर कापत होते.’’ असा गौप्यस्फोट माजी गृहमंत्री अनिल देशमुख यांनी केला आहे. परमबीर यांनी देशमुखांवर कथित खंडणीबाबत केलेल्या आरोपांची चौकशी करण्यासाठी राज्य सरकारने चांदीवाल समिती नेमली आहे. या समितीसमोर देशमुखांना आज हजर करण्यात आले. या समितीसमोर बडतर्फ पोलिस अधिकारी सचिन वाझे यांचे वकील योगेश नायडू यांच्या प्रश्नाला उत्तर देत असताना देशमुखांनी धक्कादायक खुलासे केले.

‘अँटिलिया’ प्रकरणाचा तपास मुंबई पोलिसांकडून ‘एटीएस’कडे हस्तांतरित करू नये, अशी परमबीरसिंह यांची इच्छा होती, असा दावाही देशमुखांनी केला. देशमुख म्हणाले की, ‘‘ अँटिलिया प्रकरणाचा तपास दहशतवाद विरोधी पथकाकडे (एटीएस) सोपविण्याची सूचना त्यावेळी बैठकीला उपस्थित अधिकाऱ्यांनी केला होती. परमबीरसिंहांनी त्याला विरोध करून तो मुंबई पोलिसांनीच तपास करावा अशी भूमिका घेतली होती. मी हे प्रकरण ६ मार्च २०२१ रोजी एटीएसकडे दिले होते यानंतर गुन्हे गुप्तवार्ता विभागातून मी सचिन वाझे यांची हकालपट्टी केली होती.’’

''मी तीन अतिरिक्त सचिवांच्या उपस्थितीत परमबीरसिंह यांना फोन केला होता. ‘अँटिलिया’ आणि मनसुख हिरेन मृत्यूप्रकरणात तुम्ही सरकारला अंधारात कसे ठेवू शकता? अशी विचारणा मी केली होती. मी प्रश्न विचारताच ते थरथर कापू लागले होते.''

- अनिल देशमुख, माजी गृहमंत्री