Aryan Khan Case : समीर वानखेडेंवर आरोप करणारा पंच प्रभाकर साईलचा मृत्यू

मुंबई : कार्डीलिया क्रूझ ड्रग्स (Cruise Drugs Case) प्रकरणातील पंच प्रभाकर साईलचा (Prabhakar Sail Death) मृत्यू झाला आहे. प्रभाकर हा आर्यन खानला अटक केल्यानंतर चर्चेत आलेल्या किरण गोसावीचा बॉडीगार्ड होता. तसेच प्रभाकरने एनसीबीचे तत्कालीन झोनल डायरेक्टर समीर वानखेडेंवर गंभीर आरोप केले होते. प्रभाकरच्या आरोपामुळे खळबळ माजली होती. त्याचा शुक्रवारी दुपारी ह्रदय विकाराच्या धक्क्याने मृत्यू झाल्याची माहिती आहे.

प्रभाकर साईलचा मृतदेह आज सकाळी अंधेरी येथील त्याच्या घरी आणला जाईल. त्यानंतर त्याच्यावर अंत्यसंस्कार करण्यात येणार आहे. याबाबत एबीपी माझाने वृत्त दिले आहे.

कोण होता प्रभाकर साईल? -

आर्यन खानला अटक केल्यानंतर (Aryan Khan Drugs Case) आर्यनसोबत एका व्यक्तीचा फोटो समोर आला होता. ती व्यक्ती म्हणजे किरण गोसावी होती. कार्डिलिया क्रूझ ड्रग्स प्रकरणी किरण गोसावी देखील एनसीबीचा पंच होता. तसेच त्याचा बॉडीगार्ड प्रभाकर साईल देखील एनसीबीचा पंच होता. पण, प्रभाकर साईलने पलटी मारत एनसीबीचे तत्कालीन अधिकारी समीर वानखेडेंवर गंभीर आरोप केले होते.

प्रभाकर साईलच्या आरोपानंतर खळबळ -

आर्यन खानला अटक केल्यानंतर शाहरुख खानला २५ कोटी रुपये मागितले होते. यापैकी ८ कोटी रुपये अंमली पदार्थ नियंत्रण विभागाचे विभागीय संचालक समीर वानखेडेंना देण्यात येणार होते, असा आरोप प्रभाकर साईलने केला होता. महत्वाचं म्हणजे प्रभाकर साईल हा एनसीबीचा पंच होता. त्याने आर्यन खान ड्रग्स प्रकरणात साक्ष दिली होती. पण, साक्ष नोंदवताना कोऱ्या कागदावर सही घेण्यात आली, असा गंभीर आरोप देखील त्याने केला होता. त्यानंतर एनसीबीच्या कारवाईवर प्रश्नचिन्ह निर्माण झाले होते.