Eknath Khadse: बाळासाहेबांची शिवसेना अन् RSS; खडसेंनी असा जोडला संबंध

मुक्ताईनगर : शिवसेनेच्या फुटीनंतर एकनाथ शिंदे गटाला बाळासाहेबांची शिवसेना असं नव नाव निवडणूक आयोगाकडून देण्यात आलं आहे. आयोगाच्या या निर्णयाचे राज्यभर पडसाद उमटले आहेत. यावर राष्ट्रवादी काँग्रेसचे नेते एकनाथ खडसे यांनी देखील भाष्य केलंय. त्यांनी एकनाथ शिंदेंच्या पक्षाचं नाव आणि राष्ट्रीय स्वयंसेवक संघासोबतचा एक योगायोग सांगितला आहे. (Balasahebanchi Shiv Sena and Balasahebanchi RSS coincidence told by Eknath Khadse)

खडसे म्हणाले, निवडणूक आयोगानं धनुष्यबाण चिन्ह बाद केल्यानंतर उद्धव यांच्या पक्षाला उद्धव बाळासाहेब ठाकरे शिवसेना असं नामकरण करत मशाल चिन्ह दिलं. तर शिंदे गटाला बाळासाहेबांची शिवसेना हे नाव दिलं पण अद्याप चिन्ह दिलेलं नाही. या दोन्ही पक्षांच्या माध्यमातून आणि नवीन चिन्हांमुळं येणारी अंधेरीची पोटनिवडणूक अगदी चुरशीचं होईल.

बाळासाहेबांची शिवसेना आणि आरएसएस

बाळासाहेब देवरस यांनी राष्ट्रीय स्वयंसेवक संघाची स्थापना केली होती. पण आता हा योगायोग आहे की बाळासाहेब देवरस यांच्या नावाशी मिळतं जुळतं 'बाळासाहेबांची शिवसेना' असं नाव शिंदे गटाला मिळालं आहे. यामधून कोणाला कसा अर्थ काढायचा तो त्यांनी काढावा, असंही खडसे यांनी म्हटलं आहे.

नव्या चिन्हामुळं कोणत्या गटाची होणार अडचण

वर्षानुवर्षे शिवसेनेनं धनुष्यबाण म्हणून निवडणुका लढवल्या. तळागळात, ग्रामीण भागात या चिन्हाची ओळख होती. पण आता उद्धव ठाकरेंच्या शिवसेनेचं 'मशाल' हे चिन्ह पुढं आलेलं आहे. अशा प्रकारे जेव्हा कोणतंही नवं चिन्ह येतं तेव्हा ते चिन्ह रुजवण्यासाठी खूप मेहनत घ्यावी लागते. पण गावपातळीवर ज्याचं संघटन आहे, त्याला चिन्हाचा प्रसार करण्याची गरज पडत नाही, त्याला ते सोईच असतं. शिवसेनेचं संघटन हे गावपातळीवर गेलेलं आहे. त्यामुळं उद्धव ठाकरेंच्या शिवसेनेला फरशी अडचण येणार नाही. शिंदे सेना ही नवीन सेना असून त्यांचेही आमदार ग्रामीण भागापर्यंत आहेत. त्यामुळं त्यांनाही फारशी मेहनत घ्यावी, लागेल असं मला वाटत नाही, असंही यावेळी एकनाथ खडसे यांनी म्हटलं आहे.