निवडणुकीत उदयनराजे-शिवेंद्रराजे आमनेसामने असतीलच असं नाही; प्रवीण दरेकरांचं सूचक वक्तव्य | Sakal
sakal

बोलून बातमी शोधा

Udayanraje Bhosale-Shivendraraje Bhosale

भाजपच्या साडेतीन नेत्यांना लवकरच जेलची हवा खावी लागणार आहे, असा गौप्यस्फोट खासदार संजय राऊत यांनी केला होता.

'निवडणुकीत उदयनराजे-शिवेंद्रराजे आमनेसामने असतीलच असं नाही'

सातारा : साताऱ्याचे दोन्ही राजे (Udayanraje Bhosale-Shivendraraje Bhosale) आमचेच आहेत. त्यामुळे नगरपालिकेच्या निवडणुकीत (Satara Municipal Election) ते आमनेसामने असतीलच, असे नाही. त्याबाबत विधानसभेचे विरोधी पक्ष नेते देवेंद्र फडणवीस (Devendra Fadnavis) निर्णय घेतील, अशी माहिती विधान परिषदेचे विरोधी पक्षनेते प्रवीण दरेकर (Pravin Darekar) यांनी येथे पत्रकार परिषदेत दिली. सातारा शहराची हद्दवाढ होऊनही अद्यापपर्यंत राज्य सरकारने एका दमडीचाही निधी दिलेला नाही, तसेच अवकाळीने उद्‍ध्वस्त शेतकऱ्यांनाही मदत दिलेली नाही, याबाबत तातडीने निर्णय घ्यावा, अन्यथा येणाऱ्या अधिवेशनात पर्दाफाश करू, असा इशाराही त्यांनी दिला आहे.

महाविकास आघाडीचे सरकार (Mahavikas Aghadi Government) धनदांडगे, वाइन उद्योग, बारवाल्यांसाठी काम करत आहे. एका बाजूला मंदिरे, शाळा बंद, तर दुसरीकडे मॉलमध्ये वाइन विक्री हे सरकार करत आहे. त्याचा शेतकऱ्यांना काहीही फायदा नसून शेतकऱ्यांच्या खांद्यावर बंदूक ठेऊन हा उद्योग सुरू आहे, अशी टीका करून श्री. दरेकर म्हणाले, ‘‘साखर कारखानदारीस राज्य सरकारकडून कोणतेही पॅकेज मिळालेले नाही, ही दुर्दैवी बाब असून, केंद्रातील मोदी सरकारने साखर उद्योगांसाठी पाच हजार ३६१ कोटींचे पॅकेज दिले. इथेनॉल निर्मितीला प्राधान्य दिल्यामुळे १५ हजार कोटींचा महसूल मिळत आहे.’’ सातारा शहराच्या हद्दवाढीचा निर्णय सरकारने घेतला; पण अजून एक दमडीचाही निधी मिळालेला नाही. अवकाळीत उद्‍ध्वस्त झालेल्या शेतकऱ्यांनाही मदत मिळालेली नाही. केवळ हजारो कोटीच्या घोषणा होत आहेत. त्याकडे सरकारने तातडीने लक्ष द्यावे, अन्यथा येत्या अधिवेशनात याचा पर्दाफाश आम्ही करू, असा इशारा श्री. दरेकर यांनी दिला.

हेही वाचा: 'सोमय्यांसारखा माणूस ऊठसूट आरोप करतो, त्यात कोणतंही तथ्य नाही'

साताऱ्याचे दोन्ही राजे भाजपमध्ये असूनही पालिकेच्या निवडणुकीत दोघे आमनेसामने आहेत, याविषयी विचारले असता प्रवीण दरेकर म्हणाले, ‘‘साताऱ्याचे दोन्ही राजे आमचेच आहेत. त्यामुळे पालिकेच्या निवडणुकीत ते आमनेसामने असतीलच, असे नाही. त्याबाबत विधानसभेचे विरोधी पक्ष नेते देवेंद्र फडणवीस निर्णय घेतील.’’ एसटी विलीनीकरणाबाबत सरकारची भूमिका स्पष्ट नाही. समितीने अहवाल काय दिलाय हे समजत नाही. मुळात वाटाघाटी करून मार्ग काढता येतो; पण त्यांना हा विषय झुलवत ठेवायचा असून, हे सरकार बेफिकीर व गेंड्याच्या कातडीचे आहे, अशी टीकाही त्यांनी केली.

तर तो फुसका बार निघणार...

भाजपच्या साडेतीन नेत्यांना लवकरच जेलची हवा खावी लागणार आहे, असा गौप्यस्फोट खासदार संजय राऊत यांनी केला होता. याविषयी विचारले असता श्री. दरेकर म्हणाले, ‘‘राऊत हे नेहमीच गौप्यस्फोट करतात. ते साडेतीन नेते कोण ते त्यांनाच विचारा. कारण, त्यांचा गौप्यस्फोट फुसका बार निघणार आहे.’’

Web Title: Bjp Leader Pravin Darekar Big Statement Regarding Satara Municipal Election

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top