Eknath Shinde: शिंदेंच्या शिवसेना शाखेला BMC चा धक्का; केली मोठी कारवाई

राज्यात सत्तांतर झालं त्यानंतर शिवसेनेत दोन गट तयार झाले. एकनाथ शिंदे आणि उद्धव ठाकरे यांनी खरी शिवसेना कोणाची यासाठी न्यायालयात धाव घेतली. ही सुनावणी सुरू असतानाच आपल्या गटाला बळकटी मिळावी यासाठी दोन्ही गटाकडून हालचाली सुरू झाल्या. एकनाथ शिंदे आणि उद्धव ठाकरे यांनी आपल्या शाखा सुरू केल्या.

अशातच मुंबईतल्या चेंबूर याठिकाणी असलेल्या शिंदे गटाच्या शिवसेना शाखेवर कारवाई करण्यात आली आहे. शिवसेना शाखा क्रमांक 154 वर मुंबई महानगपलिकेने हातोडा चालवला आहे. शिवसेनेच्या या शाखेवर मुंबई महापालिकेने बुलडोझर चालवून शाखा उद्धवस्त केली आहे.

शौचालयाच्या जागी शिवसेनेच्या एकनाथ शिंदे गटाची शाखा होती. मुंबईतल्या एकनाथ शिंदेंच्या बांधण्यात आलेल्या पहिल्या शाखेपैकी ही एक शाखा होती. या शाखेला स्थानिकांनी आक्षेप घेतल्यानंतर ही कारवाई करण्यात आली आहे.

मुंबई महापालिकेवर सध्या प्रशासक आहे. मुंबई महापालिका आयुक्तच प्रशासकीय काम पाहत आहेत. महापालिका आयुक्त नगरविकास विभागाच्या अखत्यारीत येतं आणि मुख्यमंत्री एकनाथ शिंदे हेच नगरविकास मंत्री आहेत, त्यामुळे महापालिकेने शिवसेना शाखेवर केलेल्या कारवाईमुळे चर्चांना उधाण आलं आहे.