Sada Sarvankar : आमदार सदा सरवणकर यांच्यावर गुन्हा दाखल; नेमकं प्रकरण काय?

मुंबईः स्वतःचं शस्त्र दुसऱ्याला दिल्यामुळे शिवसेना आमदार सदा सरवणकर यांच्यावर गुन्हा दाखल झाला आहे.

सरवणकर यांचा शस्त्र परवाना रद्द होणार असल्याची माहिती, गृहमंत्री देवेंद्र फडणवीस यांनी सभागृहात दिली आहे.

सरकारी पक्षाचे आमदार असल्यामुळे त्यांना क्लिन चीट दिली गेल्याचा आरोप, विरोधकांकडून होत होते. मात्र त्यांना शस्त्र कायद्यांतर्गत नोटीस पाठवण्यात आली होती.

त्यांनी स्वतःचं शस्त्र दुसऱ्याला दिल्याने त्यांच्यावर कारवाई झाली आहे. मुंबई पोलिसांनी सदा सरवणकर यांच्यावर शस्त्र कायद्यांतर्गत गुन्हा दाखल केला आहे. 'एबीपी माझा'ने यासंदर्भातील वृत्त दिले आहे.

नेमकं प्रकरण काय?

प्रभादेवी येथील मिरवणुकीत ठाकरे आणि शिंदे गटातील कार्यकर्त्यांमध्ये राडा झाला होता. त्यानंतर पुन्हा एकदा या दोन्ही गटात मध्यरात्री हाणामारी झाली होती. या राड्यावेळी दादर पोलीस ठाण्यात गोळीबाराची घटना घडली होती.

त्यानंतर पोलिसांनी घटनास्थळावरून काडतूस आणि सरवणकरांच्या बंदुकीचे नमुने तपासले. त्यानंतर बॅलेस्टिक तज्ज्ञांच्या अहवाल आला. बॅलेस्टिक तज्ज्ञांच्या अहवालात घटनास्थळावरून जप्त केलेले काडतूस आणि त्यांच्या बंदुकीचे नमुने जुळले होते. ती जप्त केलेली काडतुसे आणि त्यांच्या बंदुकीचे नुमने मिळते जुळत होते.