'ईडीने एकदा नोटीस काय बजावली तर इंजिननं यु-टर्नच घेतला'

मनसेप्रमुख राज ठाकरे यांनी काल मनसेच्या गुढी पाडवा मेळाव्यात महाविकास आघाडी आणि शरद पवार यांच्यावर टीका केली. यात त्यांनी केलेल्या आरोपांमुळे आता महाविकास आघाडी आणि मनसे यांच्यात टोलेबाजी सुरु आहे. दरम्यान, राज ठाकरे यांच्या वक्तव्यावर आता राजकीय वर्तुळातून प्रतिकिया येत आहेत. राज ठाकरे यांचा गुडीपाडवा मेळावा होता की भाजपचा मेळावा होता हे काही कळायला मार्ग नाही. ईडीने एकदा काय नोटीस बजावली तर इंजिनने लगेच यू-टर्न घेतला, कोहिनूर टॉवर लगेच हालायला लागला' असा टोला राष्ट्रवादीचे नेते छगन भुजबळ (chagan bhujbal) यांनी मनसेचे अध्यक्ष राज ठाकरेंना लगावला आहे.

राज ठाकरे यांनी या भाषणात भुजबळ यांच्यावर टीका केली होती. दोन वर्ष जेलमध्ये राहून आलेल्या छगन भुजबळ यांना मंत्रिपद दिले ते काय स्वातंत्र्य सेनांनी होते का? असा सवाल राज ठाकरे यांनी केला होता. आज नाशिकमध्ये पत्रकारांशी बोलत असताना भुजबळ यांनी राज यांना जशास तसे उत्तर दिले. ते म्हणाले, या आधी राज ठाकरेंनी भाजपाचा कडवा विरोध केला होता पण काल त्यांनी अचानक टर्न घेतला. असं वाटत होतं की, ही भाजपची सभा आहे. त्यांनी माझ्यावरही टीका केली. मला मंत्रिपद मिळाले वगैरे, पण मी पंतप्रधान नरेंद्र मोदींवर टीका करतच होतो, असा ट्रॅक कधी बदलला नाही त्यामुळे मला राष्ट्रवादीने बक्षीस म्हणून शपथविधीला पहिले पाचारण केले, असा पलटवार भुजबळांनी केला आहे.

राज ठाकरे यांच्या मशिदीच्या भोंगा बंद करण्याबाबतच्या वक्तव्यावर ते म्हणाले, देशात मशिदीच्या भोंग्याबाबत भाजपला कायदा करायला सांगा, महाराष्ट्रातही त्यांनी सरकार असताना केले नाही. निवडणुका आल्याने धर्मवाद वाढवून लोकांना गोळा करण्याचे काम सुरू आहे. काल त्यांच्या स्टेजवर फक्त भाजपचे झेंडे नव्हते. मुंबईत ते भाजपसोबत येऊ शकतात. फक्त भाजप त्यांना घेते की नाही हे बघावे लागेल, असंही भुजबळ म्हणाले आहेत.