गाडीतूनच CM शिंदेंचा जिल्हाधिकाऱ्यांना फोन; हिंगोली पुराचा घेतला आढावा

मुख्यमंत्री एकनाथ शिंदे सध्या दिल्ली दौऱ्यावर आहेत. दिल्लीमध्ये ते भाजपा पक्षश्रेष्ठींच्या भेटी घेत आहेत. दरम्यान, राज्यात हिंगोली जिल्ह्यात आसना नदीला पूर आल्याची स्थिती आहे. या परिस्थितीचा आढावा एकनाथ शिंदेंनी आज घेतला आहे. त्यांचा व्हिडीओही समोर आला आहे. (Eknath Shinde Hingoli Flood News)

मुख्यमंत्री एकनाथ शिंदे (CM Eknath Shinde) हे दिल्ली दौऱ्यावर असून हिंगोली जिल्ह्यातील आसना नदीला आलेल्या पूराबाबतच्या सद्यस्थितीची माहिती जिल्हाधिकाऱ्यांकडून फोनद्वारे घेतली.पूरग्रस्तांची सर्व व्यवस्था करावी तसेच कोणतीही जीवितहानी होणार नाही याला प्राधान्य देण्याचे निर्देशही त्यांनी दिले. प्रवासात असतानाच शिंदेंनी जिल्हाधिकाऱ्यांना फोन करत हा आढावा घेतला आहे.

हिंगोली (Hingoli Rain) जिल्ह्यात मागील चोवीस तासात आज सकाळी आठ वाजेपर्यंत ६६.७० मिलीमीटर पावसाची नोंद झाली आहे. जिल्ह्यातील बाळापूर, डोंगरकडा, वारंगा, आंबा, गिरगाव, कुरुंदा या सहा मंडळात अतिवृष्टी झाली आहे. तर कयाधु, आसना, जलेश्वर या नद्यांना पुर आला आहे. या पावसाने पिकांचे नुकसान देखील झाले आहे. जिल्ह्यात सर्वाधिक कुरुंदा मंडळात १७९.३ मिलीमीटर पाऊस झाला आहे.