Chipi Airport: 'नारायण मला तुझा अभिमान आहे असेच बाळासाहेब म्हणाले असते'

मालवण: "चिपी विमानतळातचं (chipi airport) नारायण राणेंचं (narayan rane) स्वप्न पूर्ण होत असताना, त्यावेळी बाळासाहेबांच्या मुलाची व्यासपीठावरील उपस्थिती हा बाळासाहेबांचाच आशिर्वाद आहे. आमच्या कुटुंबाचं बाळासाहेबांबरोबर वेगळ नातं आहे" असं कणकवलीचे आमदार नितेश राणे (nitesh rane) म्हणाले. आज चिपी विमानतळाच्या उद्घाटनाच्या निमित्ताने ते बोलत होते.

"कोकणच्या विकासाची, शिवसेना उभी करण्याची जबाबदारी बाळासाहेबांनी नारायण राणेंवर टाकली होती. कडवट, निष्ठावान शिवसैनिकाप्रमाणे नारायण राणेंनी शिवसेना इथे रुजवली. आज हा क्षण पाहायला बाळासाहेब असते, तर पाठिवर थाप मारुन, नारायण मला तुझा अभिमान आहे असेच बाळासाहेब म्हणाले असते" असे नितेश राणे म्हणाले.

"बाळासाहेबांनी नारायण राणेंना मुंबईतून कोकणात पाठवलं नसतं, डोक्यावर हात ठेवला नसता, तर आज हा क्षण बघता आला नसता. हे सगळ श्रेय बाळासाहेबांच आहे" असं नितेश राणे म्हणाले.

"नारायण राणे आज वस्तुस्थिती मांडतील. सगळे अनुभव स्वत:च्या डोळ्यासमोर पाहिले आहेत. सी वर्ल्ड प्रकल्प असो एकूणच मनातल्या भावना मांडतील, कोणाला तो गौप्यस्फोट वाटू शकतो, फक्त ते बघण्याच्या दृष्टीकोनावर अवलंबून आहे" असे नितेश राणे म्हणाले.