Indore Bus Accident : मृतांच्या नातेवाईकांना प्रत्येकी १० लाखांची मदत; CM शिंदेंची घोषणा

मुंबई : मध्य प्रदेशातील इंदूरमध्ये झालेल्या राज्य परिवहन महामंडळाच्या बस अपघातात मृत्यूमुखी पडलेल्या प्रवाशांच्या नातेवाईकांना प्रत्येकी १० लाख रुपयांची मदत राज्य सरकारकडून जाहीर करण्यात आली आहे. याबाबतचे निर्देश मुख्यमंत्री एकनाथ शिंदे यांनी एसटी महामंडळाला दिले आहेत. (CM Shinde announce Indore Bus Accident Relief 10 lakh each announced to relatives of deceased)

CM शिंदे म्हणाले, पूलावरुन कोसळलेल्या एसटी बसमधील १३ प्रवाशांचा मृत्यू झाला असून त्यांचे मृतदेह हाती आले आहेत. झालेली घटना अत्यंत दुर्देवी असून मृत्यांना मी भावपूर्ण श्रद्धांजली अर्पण करतो त्यांच्या कुटुंबियांप्रती मी सहवेदना प्रकट करतो.

याप्रकरणी मध्य प्रदेशचे मुख्यमंत्री शिवराजसिंह चौहान यांच्याशी मी स्वतः दोनवेळा फोनवरुन चर्चा केली. त्यांनी देखील ही घटना अतिशय गांभीर्यानं घेतली आहे. एक स्वतंत्र मंत्री देखील त्यांनी या ठिकाणी नेमण्यात आला आहे. दरम्यान, राज्य शासनाच्यावतीनं मृतांच्या कुटुंबियांना प्रत्येकी १० लाख रुपयांची मदत जाहीर करण्यात आली आहे.

दरम्यान, इंदूरमध्ये नर्मदा नदीवरील पूलावरुन जाणारी महाराष्ट्राची एसटी बस दुपारच्या दरम्यान कोसळली. यामधील १३ प्रवाशांचा मृत्यू झाला असून १५ प्रवाशांचे प्राण वाचवण्यात यश आले आहे. मृतांपैकी ८ जणांची ओळख पटली असून त्यातील ५ जण हे महाराष्ट्रातील आहेत.

पंतप्रधान राष्ट्रीय मदत निधीतून मदत

मध्य प्रदेशातील धार येथील बस दुर्घटनेत मृत्युमुखी पडलेल्यांच्या नातेवाईकांना PMNRF कडून प्रत्येकी 2 लाख रुपयांची तर, जखमींना 50,000 हजार रुपयांची मदत जाहीर करण्यात आली आहे.