Corona Update: राज्यात आज शंभरच्यावर कोरोना रुग्णांची नोंद; तर रिकव्हरी रेट ९८ टक्क्यांवर

Corona Update : राज्यात दिवसभरात शंभरहून अधिक नव्या कोरोनाबाधित नागरिकांची नोंद झाली. तर ७५ रुग्णांना उपचारांनंतर रुग्णालयातून डिस्चार्ज देण्यात आला. यामुळं राज्यातील कोरोना रुग्णांचं बरे होण्याचं प्रमाणं हे ९८.१७ टक्क्यांवर पोहोचलं आहे. राज्याच्या आरोग्य विभागानं ही माहिती दिली आहे. (Corona Update 138 Corona patients reported in Maharashtra today)

या माहितीनुसार, राज्यात आज १३८ नवीन रुग्णांचे निदान झालं. तसेच ७५ रुग्ण बरे होऊन घरी गेले. आजपर्यंत एकूण ८०,२३,७२० करोनाबाधित रुग्ण बरे होऊन घरी परतले आहेत. यामुळं राज्यातील रुग्ण बरे होण्याचं प्रमाण (Recovery Rate) ९८.१७ टक्के एवढं झाला आहे.

तसेच राज्यातील कोरोनाबाधित रुग्णांचा मृत्यूदर १.८१ टक्के एवढा आहे. आजपर्यंत तपासण्यात आलेल्या ८,७६,६४,१४५ प्रयोगशाळा नमुन्यांपैकी ८१,७३,१४९ (९.३२ टक्के) नमुने पॉझिटिव्ह आले आहेत. दरम्यान, आज राज्यात १४,०७७ चाचण्या झाल्या आहेत. त्यांपैकी २१७३ RT-PCR चाचणी, ११,९०६ RAT चाचणीची नोंद प्रयोगशाळेत झालेली आहे. आजचा पॉझिटिव्हीटी १.० टक्के आहे.

JN.1 व्हेरीएंटचे किती रुग्ण?

सध्या राज्यात XBB.१.१६ ह्या व्हेरीएंटचे १९७२ रुग्ण सापडले आहेत. त्यापैकी १९ रुग्णांचा मृत्यु झाला आहे. तर JN.1 या व्हेरियंटच्या ३२ रुग्णांची नोंद झाली आहे. यांपैकी सर्वाधिक पुण्यात १७ रुग्ण, ठाणे - ५, बीड -३, संभाजीनगर - २, कोल्हापूर - १, अकोला - १, सिंधुदुर्ग - १, नाशिक - १, सातारा - १ सापडले आहेत.