'माझं बोलणं झालंय...'; रोहित पवारांच्या ED चौकशीवर सुप्रिया सुळेंनी स्पष्टच सांगितलं!

राज्यात सध्या विरोधकांवर ईडी, सीबीआय, आयकर विभागाच्या कारवायांचा धडाका सुरू आहे. राष्ट्रवादीचे आमदार रोहित पवार यांच्यावर आता ईडीने निशाणा साधला आहे. त्यावरुनच रोहित पवारांच्या आत्या आणि राष्ट्रवादीच्या खासदार सुप्रिया सुळे यांनी प्रतिक्रिया दिली आहे. आम्हाला काही लपवायची गरज नाही, असंही सुळे यांनी सांगितलं आहे. (Supriya Sule on Rohit Pawar)

पुण्यातल्या कोथरुडमध्ये महागाईविरोधात आंदोलन सुरू आहे. या आंदोलनात सुप्रिया सुळे सहभागी झाल्या आहेत. तिथे त्या बोलत होत्या. रोहित पवारांच्या (Rohit Pawar) चौकशीविषयी विचारणा केली असता सुळे (Supriya Sule) म्हणाल्या की, रोहित पवार यांची कोणतीही चौकशी सुरू झालेली नाही. अशा बातम्या फक्त माध्यमांमध्ये चालतायत. प्राथमिक चौकशी झाल्याच्या बातम्याही येतायत. पण माझं रोहितशी बोलणं झालंय, त्यांना अजून नोटिस आलेली नाही.

सुप्रिया सुळे पुढे म्हणाल्या की, आमच्यापैकी कोणालाही नोटीस आली तर आमची नेहमी सहकार्याची भूमिका राहिलेली आहे. माझा न्यायव्यवस्थेवर पूर्ण विश्वास आहे. त्यामुळं आम्हाला काही लपवायची गरज नाही. अशी काही चौकशी झाली तर आम्ही उत्तर देऊ. पेट्रोल, डिझेल, सीएनजी, घरगुती गॅसच्या दरवाढीविरोधात राष्ट्रवादीनं पुण्यात जनआक्रोश आंदोलन केलं. यावेळी सुप्रिया सुळे यांच्या नेतृत्वाखाली राष्ट्रवादीने सरकारचा निषेध केला.