'ईडी, एनसीबी, सीबीआय, पाकिस्तान हे सर्व भाजपच्या प्रचार मोहिमेतील साधने'

मुंबई : राज्याचे अल्पसंख्यांक मंत्री नवाब मलिक यांच्या घरावर सक्तवसुली संचालनालयाने (ईडी) आज बुधवारी (ता.२३) सकाळी छापा टाकला. त्यानंतर मलिक यांना चौकशीसाठी कार्यालयात नेण्यात आले. तब्बल आठ तास चौकशी केल्यानंतर नवाब मलिक (Nawab Malik) यांना अटक करण्यात आली आहे. या सर्व प्रकरणावर शिवसेना (Shiv Sena) नेत्या राज्यसभा सदस्या प्रियंका चतुर्वेदी (Priyanka Chaturvedi) यांनी प्रतिक्रिया दिली आहे. त्या आपल्या ट्विटमध्ये म्हणतात ईडी, आयटी, एनसीबी, सीबीआय, पाकिस्तान, दाऊद हे सर्व भाजपच्या प्रचार मोहिमेतील साधने आहेत. वेळोवेळी त्यांना पुढे करुन भाजपच्या कथनाला मदत केली जाते. (ED, NCB, CBI All Are BJPs Campaign Tools, Says Priyanka Chaturvedi)

महाराष्ट्राने एसएसआर खटल्यात सीबीआयची पोलखोल केली होती. आम्ही अंमलीपदार्थ प्रकरणात एनसीबीला उघडे पाडले होते. आज ईडीने आपलेच महत्त्व घटवले असून ते भाजपचे विस्तारित खाते बनले आहे, असा घणाघाती हल्ला प्रियंका चतुर्वेदी यांनी केंद्रीय तपास यंत्रणेवर केला आहे.