Sanjay Raut : शरद पवारांना घाबरवण्यासाठी आरोपपत्रात त्यांचं नाव; न्यायालयाचं निरीक्षण

संजय राऊतांना जामीन मंजूर करताना न्यायालयाने त्यांची अटक अवैध असल्याचं नमूद केलं होतं. तसंच आता आणखी एक निरीक्षण नोंदवण्यात आलं आहे. ते म्हणजे आरोपपत्रात शरद पवारांचा उल्लेख फक्त भीती निर्माण करण्यासाठीच होता, असंही न्यायालयाने म्हटलं आहे.

शिवसेना खासदार संजय राऊत यांना काल न्यायालयाने पत्राचाळ घोटाळा प्रकरणात जामीन मंजूर केला. यावेळी राऊतांची अटक अवैध असल्याचं न्यायालयाने नमूद केलं आहे. तसंच शरद पवारांबद्दलही महत्त्वाचं निरीक्षण नोंदवलं आहे. आरोपपत्रात शरद पवारांचा उल्लेख केवळ त्यांना घाबरवण्यासाठी ईडीने केला होता. जेणेकरून पवारांना वाटेल की आता पुढचा नंबर त्यांचाच आहे, यासाठीच उल्लेख केला होता, असंही न्यायालयाने म्हटलं आहे.

ईडीने तपासादरम्यान म्हाडाचे अधिकारी याचा या गैरव्यहरात सहभाग असल्याचे चंदन केळेकर, वाधवन आणि स्वप्ना पाटकर यांनी जबाबात म्हटले होते. मात्र त्या अधिकाऱ्यांवर कोणतीही कारवाई झाली नाही. मात्र शरद पवार आणि त्यावेळच्या मुख्यमंत्र्यांना इशारा देण्याच्या उद्देशाने किंवा त्यांना घाबरवण्यासाठीच त्यांच्या नावाचा आरोपपत्रात उल्लेख केल्याचं दिसतं, असं निरीक्षण न्यायालयाने नोंदवलं आहे.