एकनाथ शिंदेंची सात वाजता पत्रकार परिषद; कोणता बॉम्ब फोडणार?

मुंबई : विधान परिषदेच्या निकालानंतर साधारण 40 आमदारांसह बंड केलेलं शिवसेना नेते एकनाथ शिंदे (Eknath Shinde सध्या गुवाहटी येथे असून, संध्याकाळी सात वाजता ते पत्रकार परिषद घेणार आहेत. या पत्रकार परिषदेत शिंदे नेमका कोणता बॉम्ब फोडणार याकडे सर्वांचे लक्ष लागले आहे. त्याआधी मुख्यमंत्री उद्धव ठाकरे फेसबुकच्या माध्यमातून जनतेशी संवाद साधणार आहेत. या संवादादरम्यान, उद्धव ठाकरे नेमकं काय बोलणार याकडे सर्वांचे लक्ष लागलेले आहे. (Eknath Shinde News In Marathi)

एकनाथ शिंदेंचं नवं ट्वीट; म्हणाले.. प्रभूंचे आदेश बेकायदेशीर

शिवसेनेच्या प्रतोदपदी भारत गोगावले यांची नियुक्ती करण्यात आली आहे, असे ट्वीट एकनाथ शिंदे यांनी केले आहे. शिंदे यांना गटनेते पदावरून हटवल्यानंतर आज शिवसेनेकडून आणखी एक निर्णय घेण्यात आला आहे. यामध्ये शिवसेना विधीमंडळ मुख्य प्रतोदपदी भरत गोगावले यांची नियुक्ती करण्याचा निर्णय घेण्यात आला आहे. त्यानंतर एकनाथ शिंदे यांनी ट्वीट केले आहे. या ट्वीटमध्ये शिंदे यांनी म्हटले आहे की, शिवसेना विधिमंडळ मुख्य प्रतोद पदी शिवसेना आमदार श्री.भरत गोगावले यांची नियुक्ती करण्यात आली आहे. सबब, श्री.सुनील प्रभू यांनी आजच्या आमदारांच्या बैठकीबद्दल काढलेले आदेश कायदेशीरदृष्ट्या अवैध असल्याचे म्हटले आहे. त्यामुळे शिंदेच्या या ट्वीटमुळे ठाकरे आणि शिंदे यांच्यातील वाद शिगेला पोहचला आहे.

बंडखोर आमदारांना शिवसेनेचा कडक इशारा

विधान परिषदेची निवडणूक पार पडल्यानंतर शिवसेनेचे आमदार एकनाथ शिंदे काही आमदारांना घेऊन गुजरातला गेले. तेथून ते गुवाहाटी येथे गेले आहेत. दरम्यान, शिंदे यांच्यासोबत गृहराज्यमंत्री शंभूराज देसाई हेही उपस्थित आहेत. त्यात आज सायंकाळी ५ वाजता शिवसेनेतर्फे (Shiv Sena) बैठकीचे आयोजन करण्यात आले आहे. यासाठी शंभूराज देसाई (Shambhuraj Desai) यांना नोटीस पाठवून बैठकीला हजर राहण्यास सांगण्यात आले आहे. पक्षाच्या बैठकीला हजर रहा नाही तर पक्ष सोडा, असा इशारा नोटीसमधून देण्यात आला आहे.